Shillong, Kyllalyngkot 07: U Chief Secreary ka jylla u Bah DP Wahlang hynne ka nsgi Baar ula pyntip ba ka Expert Committee halor ka Reservation Policy, kala pyndep ia ka jingiasyllok ha kylleng jong ka jylla Meghalaya.
U Bah D.P. Wahlang ula pynthikna ba katei ka committee, kala leit sha kylleng ki jaka jong ka jylla kiba kynthup ia ka Nongbah Shillong, Jowai bad kiwei kiwei ki thain ha ka rilum Garo bad kala ioh ban lum ia kiba bun ki jingai jingmut na kiba bun baling.
Katei ka jingiasyllok ka long da ka jingthmu ban pynrung ia ka sur jongu paidbah, ki seng sain pyrthei, ki nongialam jong ki samla pule, ki sengbhalang bad kiwei kiwei ki kynhun kiba don ia ka jingsngewkhia. Kane ka jingle kaba long kyllum lang ia baroh kan pynthikna ba baroh ki jaidbynriew bad ki liang bapher bapher kin ioh ban pynpaw ia ka jingpynsngew ka jongki, kaban ailad ruh ia ka Committee ban sngewthuh khambha ia katei ka mat kaba iadei bad ka Reservation Policy.
“Ka committee kala donbynta bad kiba bun balang kiba na ki liang bapher bapher ban pynthikna ba man la ki mat dei ban pdiang” ong u Chief Secretary bad ka banjur “Kane kadei ka bynta kaba long kongsan bha kaba pyni ia ka jingskhem jingmut jong ka sorkar ban kynthup lang ia baroh bad ban ym shah liang ha ka jingthaw ia ka polisi treikam”.
Hadien ba la pyndep ia ka jingiasyllok ha kylleng ki jaka jong ka jylla, ka committee kala shong jingialang ha nongbah Delhi ban khmih bniah bad ban iatai sani ia ka jingpynsngew kaba kala iohlum.
Kane ka jingialang ka pyni ia ka jingjam sha kawei pat ka bynta ha kaba ka committee kan pynkhreh ia ki jingthoh halor ka jinglap ka jongka bad ban shna kum ka kaiphod kaba pura. La khmih lynti ba ia ka kaihod kan long kum ka jingthoh kaba kongsan bha na ka bynta ban btin lynti ban pynwandur ia ka Reservation Policy ka jylla na ka bynta ki snem ban wan.
U Bah DP Wahlang ym shim la batai eiei haduh katno la buh por ban pyndep ia katei ka kaiphod hynrei ula pynthikna pat ba ka committee kan pynleit jingmut ha kaban pynmih ia ka jinglap kaba long kaba bha bad kaba don jingmut.
