Shillong, Iaiong 17: Sa tang shi sngi bad ki kynta, ka jylla Meghalaya kan leit ban thep vote sha ka elekshon MP Lok Sabha bad ha kane ka kynti, ki bor pyniaid Election hapoh ka jingialam u Chief Electoral Officer (CEO), ka Meghalaya ym tang ba ki pynthikna ban pynlong ia ka elekshon kaba khuid bad kaba laitluid hynrei ka wer ruh ia baroh ki nongialam ha ka imlang sahlang ban iatreilang ha kaban pynlong ia ka elekshon kaba khuid bad kaba jyrngam.
Kaba ialam nakhmat duh kadei ka shnong kaba khuid tam hapoh ka dewbah Asia ka Shnong Mawlynnong, ha kaba ki khynnah, ki longkmie bad ki rangbah da kawei ka jingmut kila pynkhuid ia ka jaka thep vote kaba don ha ka skul shnong, kaba la pyniaid da ka Church of North India.
U Rangbah Shnong ka Mawlynnong u Bah Thomlin Khongthohrem ula ong, “Ka long kaba ai mynsiem ban tip ba u CEO bad ka Tnad Election kila ialam nakhmat ha kaba iadei bad ka jingsumar bad jingkhuid ha ki jaka thep vote, namar kane hi ka pyi ia ka jingiatylli bad ka jingbym shah liang ha ka kam elekshon kaba lait na ka bor jong ka pisa ne jingshah pynbiej”.
Katba u Rangbah Shnong jong kawei ka shnong kaba khuid ha ka nongbah Shillong ka Nongrim Hills u Bah Bantyllilang Narry ula ong, “Kane ka sienjam kadei kaba dei ban pdiang bha namar kan pynthikna ba hadien ka elekshon, kan ym don ki jaboh bad ka jingpyndonkam ia ki plastic ha ki sawdong sawkun jong ka jaka thep vote. Kane ka jingleh kan long ka khubor kaban rung ha ki iing ki sem ban iada ia ka mariang ka long kaba kongsan tam kaban iaid ryngkat bad ka jingleit thep vote ki nongshong shnong”.
Mynta ka kynti u CEO ula pyllait ia ka jingbamsmai ha kaba baroh kiba donbynta bad ka shnong ka thaw, kin iatreilang ha kaban pynlong ia ka jingpynkhuid ha kylleng ki bynta kiba marjan bad ka jaka thep vote. Kane ka jingleh kam dei satia tang ban pynsngewthuh ia ki nongthep vote hynrei ban pyndonbynta ban don ka jingiadei hapdeng ki nongpyniaid ia ka election bad ki nongialam shnong ha kaban pynthikna ba nalor ka jingpynlong ia ka elekshon yn buh hakhmat ruh ia ka jingkhuid bad jingsumar ia ka mariang.
U Chief Electoral Officer ka Meghalaya, u Dr. BDR Tiwari, ula ong, “Ka jingthmu ban pyndonbynta ia kiba pyniaid iaka election bad ki nongialam shnong ban ia wanlang bad ban pyni iaka jingsumar ia ka mariang kadei namar ba ka jingim ka jong ngi ka shaniah ha ki. Ha kawei ka bynta, lada ngi thep ia ka vote na ka bynta ka lawei ka jong ngi, ka mariang ka don ia ka bynta kaba kongsan tam ban pynthikna iaka jinglong jingman ka jong ki nongshong shnong hapoh ka ri”.
U Dr Tiwari ula kyntu ia man la uwei pa uwei u nongshong shnong kynthup ia kiba pyniaid ia ka elekshon ban iashimbynta ha ka elekshon Lok Sabha da kaba buh ruh ia ka jingsngewkhia ia ka mariang bad ban kyntu ia ki samla bad ki longkmie ban iashimbynta ha ka jingpynkhuid shnong.
U CEO ual pynpaw ba ka elekshon Lok Sabha kadei kaba kongsan bha kumba long kiwei pat ki elekshon ha ka jylla.
“Ka long kaba kongsan ia ngi ban sngewthuh ia kane, namar haba ngi wan ban vote da ka jingmih ki paidbah, ngi pyndonkam ia ka hok bad ia ka kamram ka jong ngi kum kita ki nongshong shnong bashisha jong ka ri kaba khraw bad na ka bynta ka Meghalaya” la pynkut u Tiwari.
