Shillong, Iaiong 17 : U MDC barim ka Khasi Hills Autonomous District Council (KHADC) Bah Donkupar Sumer, ula mudui lang da ka ejahar (FIR) pyrshah ia u President ka Voice of the People Party (VPP) bad MLA ka Nongkrem Bah Ardent M Basaiawmoit halor ka jingkynnoh ba u donkti ha ka jyrsieh thied jaka kum u Chief Executive Member (CEM) ka Council ha u snem 2014.
U Bah Donkupar Sumer uba dei ruh u Executive Member (CEM) ba peit ia ki Council Assets, ula kynnoh ba u Bah Ardent ula leh ia ka kam tuh, kam thok, soi tuh (forgery), bad bam klop ia ka pisa jong ka Council kum u CEM ha ka kyrteng ka thied jaka ia ka Council.
Lah ban kdew hangne, u President ka VPP ha ka 15 tarik Iaiong, ula leit ujor da ka ejahar pyrshah ia u Bah Donkupar Sumer halor ka jingkynnoh bamsap pyrshah ia u na ka rynsan ialap elekshon ha kane ka kam iadie iathied jaka jong ka KHADC ha thain Mawkyrwat.
“Nga dei u Executive Member ha katei ka por, kumta kine ki jingshisha kila wan sha ka jingtip jong nga. Nga don ruh ki sakhi ban pynshisha ia kane ka kam (ejahar) ba nga la wanrah hakhmat jong phi” ong ka ejahar bala aiti sha u Officer In-charge ka Lumdiengjri Police Station.
Kat kum ka ejahar, u Bah Donkupar ula ong ba u Bah Ardent um shym la iohbor na u Executive Member jong ka Council ban iasoi ia ka sale deed bad kane ka sale deed ka dei ruh kaba khlem register.
“Ula soi ia ka kot ka bym treikam (invalid) tang ban pynthame ba ia ka jaka la dep thied bad ula bam klop ia ka pisa ba kot haduh T. 35, 25,039 na ka Account jong ka Council” ula ong ha ka ejahar.
“Hadien ngi la tip ba kane ka kot ba u (Ardent) soi, ka dei ka Non Judicial ba T.10. Ka Sale Deed ka dei kaba khlem register bad khlem siew ruh ia ka stamp duty. Kumta ka dei ka kot ka sla ka bym treikam hakhmat ka Ain bad ula soi khlem ka jingiohbor tang ban ioh bam klop ia ka pisa u paidbah” ula bynrap.
U Bah Donkupar ula ong “U soh u long ba haduh mynta mynne, ka Council kam shym la lah ban kam trai ia kane ka jaka bad kala hap buh ia ka Ophis treikam na ka jaka bala shu ai sngewbha da ki trai jaka.”.
U Bah Donkupar ula ong, ka kam soi thok jong u Bah Ardent ia ki kot ki sla kila nang paw hadien ba ka Council kala phah ia ka notice ha ka 15/7/2022 ban leh survey, u trai jaka ba kyrteng u Nolipstar Lyngdoh ia uba u Bah Ardent ula kam ba ula iasoi ia ka sale deed, ula ong ba u khlem pat ioh satia ia ka pisa ba pura bad kumta, um lah satia ban aiti ia ka jinglong trai ia ka jaka.
Ula ong ba ka sakhi satar kala paw na ka minute jong ka jingialang ba 22/07/2022 jong ka Council.
Nalor kane, une u EM barim ka KHADC ula ong ba da ka jingthmu ban bam klop shuh shuh ia ka pisa ka Council, u Bah Ardent Basaiawmoit ula wengkam ruh ia 7 ngut ki nongtrei halor ka nongrim ba ka Council kam don pisa bad hadien kata, ula thungkam pat ia 12 ngut ki briew lajong.
“Kumta, la kyrpad ia phi ban leh eiei khnang ba u Bah Ardent un nym ioh iaid laitluid hadien ka jingle ia kine ki kam shukor pisa pyrshah ia ka council bad ki paidbah” ula ong ha ka ejahar.
 ba peit ia ki Council Assets, ula kynnoh ba u Bah Ardent ula leh ia ka kam tuh, kam thok, soi tuh (forgery), bad bam klop ia ka pisa jong ka Council kum u CEM ha ka kyrteng ka thied jaka ia ka Council.){kind=link}