Agartala, Naiwieng 11: Ka jingiashun bad ki dkhot ka longiing jong u ka dei ka daw bah kaba la pynlong ia u khynnah 17 snem rta uba la kyrni ha ki jingdih drok ba un pyniap noh iala ka jong ka kmie, ka para, u kpaieit bad ia ka para marajan ha ki bynta jong ka Durai Shibbari ha Kamalpur kaba hap ha Dhalai district ka Tripura kaba la jia ha ka 5 tarik mynta u bnai, ong ka khubor pulit.
Kine baroh kila paw pyrthei hadien ba une u samla la iathuh ba ula phla hakhmat ki pulit hadien ba ula shah kem noh ha ka step sngi U Blei ba la lah na ka jaka iew ha Halahali, kata katba u dang pyrshang ban phetkrad na la shnong.
Ka kashari jong ki khynnah kala aiti sha ki bor pulit 13 sngi na ka bynta ban pynlong ia ka jingtohkit hapoh ka jaka set ia ki khynnah.U heh pulit bym kwah pynpaw kyrteng ula ong ba une u khynnah ula phla halor kane ka kam pyniap ba shyrkhei.
“Une u samla u ngeit ba ka para jong u ka isih shibun ia u bad kynnoh ruh ba ka ju iashoh bad u.Ka kmie jong u kam ju aijingkyrshan ia u, bad don beit sha ka liang ka para jong u kaba la pynbuhkhuh shibun ia u,” ong u heh pulit.
“Ula don ia ka jingthmu ban pyniap iala ka kmie bad ka para jong u la kham slem, Ban pynurlong ia kane ka jingthmu u ju peit ruh ia ka serial ‘Crime Patrol’ kata kumno ban pynjah rngai ia ki metiap hadien ba la leh ia ka kam pyniap.Kumta ha ka janmiet sngi Saitjain ba la lah, ula bteng ban tied da u dieng iala ka jong ka kmie kaba dang thiah na ka khlieh.Ula thombor iala ka para ruh ha kane kajuh ka rukom da kaba pynheh ruh ia ka jingtem,” ong u heh pulit uba la shim ia ka jingphla ka jong u.U kpaieit jong une u khynnah 70 snem rta ula iohsngew ia ka jingsawa ba rung shapoh.Ha kaba kum kane ka por une u khynnah ula tied ia u ruh na ka khlieh bad ka met haduh ba un da khlaw hashen, ong u heh pulit.
Hadien kane une u khynnah ula leit ban thep ia kine ki metiap hapoh ka pung kaba don ha kper bad sdang ban pynkhuid ia ka jingkhah snam.Ha kawei pat ka liang, ka para marjan jong ki ka Rekha Deb kala wan poi hapoh ka iing jong ki bad pan um.Kala sdang ban lyniar kynsan hadien ba kala iohi ia ka snam kaba, kumta une u khynnah ula pyniap noh ia ka ruh ha kane ka juh ka jaka, ong shuh shuh u heh pulit.
