Shillong, Nailar 1 : Ka Khasi Hills Autonomous District Council ka la rai ban pynsngew sha ka sorkar jylla ba baroh ki MDC ki pyrshah jur ia ka jingthmu ban pyntreikam noh ia ka Civil Procedure Code (CPC) bad ka Criminal Procedure Code (CrPC) ha baroh kawei ka jylla.
Haba kren bad ki lad pathai khubor hadien ka jingialang bad jan baroh ki MDC, u CEM ka Council Bah Titos W Chyne u la ong ba lada pyntreikam ia ka CPC bad ruh ia ka CRPC khlem pep ki kashari jong ki district council kin sa tlot noh ka bor treikam.
“Kumta baroh ki MDC kiba wan sha ka jingialang da kaba klet noh ia ka jingsngew party ki la pynpaw ba kim iahap bad pyrshah jur halor kane. Ngi la rai ruh ban pynsngew mardor sha ka sorkar jylla ia kane ka jingpyrshah,” ong u CEM.
U Bah Titos u la iathuh ruh ba ki don ruh ka jingsyier ba khlem pep ki kashari ha ki shnong ne village court kumjuh ruh ki kashari ha ki hima ne subordinate court kin tlot bor noh tang shu iohlad treikam ka CPC bad CRPC.
Ha kajuh ka por u ong ruh mynta ki dang ap ia ka jingpyntip (draft) na ka sorkar halor katei ka bynta n aka bynta ban ai ia ki jingai jingmut.
“Tangba shwa ba ka jingthoh kan wan na ka sorkar ngi la shim ia ka rai ba ngin pynsngew sha ka sorkar ban pyntikna ba ka bor kaba kine kim dei satia ban ktah pat ia ki district council court hynrei ban ailad ia ki ban bteng ia ka jingshakri kaba la don naduh mynshwa,” bynrap biang u CEM.
