Agartala, Nailar 10 :U nongialam ba la rim ka Seng Congress ha Tripura, u Sudip Roy Barman hynnin ka sngi ba Ar u la kynthoh tyngeh ia ka sorkar synshar BJP ha ka jylla da ka ba ong ka Congress kan wanphai pat bad kan pynkut shisyndon ia kam bymman ki ba la synshar mynta ha ka jylla.
Da ka ba kynnoh ia ka BJP halor ka jingai jingkyrshan na ka bynta ki kam thombor pyrshah ia ki nongtrei bad ki nongialam jong ki party liang pyrshah, u Barman u la ong; “Arngut ki riew rangbah ki bym shym la iashim bynta shuh ha ki kam sain hima mynta la slem bah ki la ngat ha ka jingshah thombor ha ka kynhun runar ha kane ka jan miet sngi Nyngkong ba la lah ha ka ba la hap ban pynkynriah noh ia ki shapoh GBP hospital hapdeng ka jingmynsaw ka ba jur.”
“Kane ka jingjia sa shisien pat ka la kdew halor ka jinghiar arsut ka jinglong jingman bad ka jingpulom ha ka jingtreikam da ki bor jong ka ain ha Tripura,” ong une u nongialam ka seng Congress.
Katei ka jingjia shah thombor ka la jia hapoh Majlishpur, ka ba dei ka constituency jong u Myntri ka seng BJP ka Tripura, u Sushanta Chowdhury.
U Barman u la ong ruh, “Ngi la dei ban pynlong da ki jingiakhih ha Majlishpur, hynrei na ka liang ki bor pulit kim shym la ai jingbit.Ki la ong ba ka BJP ka la dep lypa ban shim jingbit na ka bynta ka jingpynlong ia ki katto katne ki jingialang.”
“Mynta ki la leh ia ki kam thombor pyrshah ia ki nongtrei jong ki party liang pyrshah. Nga kwah ban pyntip sha baroh , ngin wanphai biang shen bad ka Congress kan pynkut noh ia kane ka jinglong jingman ba khlem ain ha ka jylla,” ong shuh shuh une u nongialam Congress ka Tripura.
