Aizawl, Nailar 10: Ka tnat pulit ka Mizoram ka la khot pynlong da ka ‘Detoxification and Rehabilitation Camp’ lane ka jingsumar ban pynkhuid ia ka bih (toxin) ka ba don hapoh ka met na ka bynta ki 340 ngut ki pulit ia ki ba la shem ba ki la don hapdeng ka jingshah ktah ha ka liang ka koit ka khiah namar ka jingkyrni ha ka jingdih kyiad ne drok, ong ka khubor heh pulit hynnin ka sngi ba Ar.
Na ka liang u heh pulit ka Mizoram u la ong ba kane ka camp ka ba 45 sngi kynthih kan bteng haduh ka 5 tarik u Nailur u ban wan.U la ong ruh ba ia kane ka camp yn pynlong ha ki khyndai tylli ki jaka jong ki phra tylli ki headquarter ka Battalion jong ka tnat pulit ka Mizoram.
Katkum u heh pulit la ong ba yn pynlong ia kane ka camp aijingsumar da ka jingiarap pisa na ka liang ka National Fund for Control of Drug Abuse (NFCDA) ka ba hap hapoh ka Union Finance Ministry.
Ia ka committee jong ki heh pulit la thaw hapoh ka jingialam jong u Deputy Inspector General of Police (Training) kum u chairman na ka bynta ban khmih bniah ha ka ba iadei bad ka jingpyniaid shaphrang ia kane ka jingialap.
Na ka liang u heh pulit u la kubur ba ki don katto katne napdeng ki bor pulit ia ki ba la shem ba ki la ngat ha ka jingshah ktah ha ki jait jingshitom bapher bapher na ka daw jong ka jingkyrni ha ka kyiad bad ki kynja drok.
Kumta da ka jingthmu ban tei pat ia ka koit ka khiah bad ka jingbiang ha ka met ka phad kum ki bor pahara na ka bynta ki kam ki ba man ka sngi la pynlong ia kane ka camp da ka tnat pulit ka Mizoram.
Ia kine ki bor pulit la pynkynriah sha ki jaka camping centre ki ba jan tam na ki Battalion headquarter bad ki shnong ki jong ki.
Ia kane ka camp la pynbit pynbiang pura da ki bor ba dei khmih bad ka ban kynthup ruh ia ka jingdonkam ban kilan met, drill, ki jingai jinghikai ki ba iadei bad ka bor jabieng, ha ka ba iadei bad ka niam bad kiwei pat.Na ka liang ki ba haiing hasem jong kine ki pulit ruh ki don ia ka jingiadei ka ba jan bad kane ka phang.
Shuh shuh ka don ruh ka jingkyrmen ba lyngba kane ka sienjam kan sei ia u soh jong ka jingjop bad ba kine ki bor pulit ki ba ioh ia kane ka lad kin ioh ia ki jingmyntoi ki ba neh bad khnang ba kin lait noh ruh na kitei ki jingmlien ba sniew.
