Shillong, Nailur 03: U Myntri ka tnad jngohkai Bah Paul Lyngdoh ha ka sngi nyngkong, ula pynbna ban pynlong ia ka tamasa Cherry Blossom 2024 ha ka 15 bad 16 tarik u Naiwieng 2024 ha Madan Kurkalang, RBDSA Sports Complex, Ri Bhoi District.
U Bah Paul ula khmih lynti ba ha katei ka tamasa, ki briew ki ban wan iashimbynta kin long ym tang na ka ri India hynrei wat na kiwei pat ki ri ruh kumjuh. U pyntip ba mynta u snem ka sorkar Jylla kan iatreilang bad ka ri Japan ban pynlong ia ka Cherry Blossom ka ban long halor ka phang pdeng “Year of Legends”.
Ula iathuh ba kin don bun ki kynhun tem kiban wan ban iashimbynta ha kane ka tamasa bad ki kynhun kiba kham paw bha ki kynthup ia ka Boney M, Kanika Kapoor, Jasleen Royal. Nalor kine, kiwei pat ki kynthup ia ka Queen Sensation na Russia bad ka kynhun tem Korn na Slovakia ki ban wan pynbyrngia ia ki paidbah ha ka tamasa.
U Bah Paul ula ong ruh, mynta u snem yn iohi ruh ia ka jingwanphai sha ka rynsan tem jong ka kynhun ba pawnam ka jylla ‘The Great Society’ ka ban long hadien 35 snem.
Ula iathuh ruh ba na ka bynta ki nongsngewtynnad ia ki jingrwai K-Pop, ka sorkar shen kan sa pynbna ia ka kynhun K-Pop kaban wan ban pynbyrngia ha ka tamasa. Kane ka kynhun kan sa pynbna kham hadien ia ka jingwan iashimbynta namar ki katto katne ki daw, namar ka kynhun kan leit ruh ban pynbyrngia ha ka ri Nepal, Thailand bad Phillipines.
Ula ong, ba ia ki tiket lah ban ioh na ka Book My Show.
U Bah Paul ula ong, kumba ka long mynta kila bun bha ki nongjngohkai kiba la wan sha ka jylla bad lyngba ka jingpynlong ia ka Cherry Blossom bad ka Bryan Adams Concert kan iai khring shuh shuh ia ki briew na kylleng ki jylla bad u ngeit skhem ruh ba man la ki nongshong shnong kiba don ka jingkitkhlieh jong ka jylla Meghalaya kin pynthikna ba kin leh ha kata ka rukom kaba long kaba bha na ka bynta ka jingsuk bad ka jingkiew shaphrang.
