Guwahati, Naiwieng 29 :U president ka APCC u Bhupen Borah haba iashim bynta ha ka rally iaid paidbah (Bharat Jodo Yatra) ha Bokakhat ula kynthoh tyngeh ia ka sorkar ba la lamkhmat da u Himanta Biswa Sarma da kaba ong ba ka kynhun kala pynlong da ka jingkhawai (picnic) ha ka kyrteng jong ka jingialang cabinet.
Haba kren sha ki lad pathai khubor, u Bhupen Borah ula ong; “U Myntri Rangbah (CM) ka Assam ula bunkam ha ki kam iabam piknik, ngi la iohi kaei kaba la jia ha Majuli… ki briew kila iap khlem ioh kano kano ka jingsumar.”
Kane ka jingkren jong u Borah ka long ruh hadien ba la pynlong ia ka cabinet meeting kaba nyngkong eh shabar ka nongbah Guwahati ha Majuli, kata ka thain ha kaba ki briew kila khlad noh na ki jingjia jong ka jingngam lieng bad ka jingbym ioh ia ki lad jingsumar.
“Kila ialeh sngewbha katba ki nongshong shnong kila iap ei namar ka jingbym ioh ia ki dawai dashin bad ki doktor ki ban sumar,” ong shuh shuh u Bora.
Lah ban kdew ba ka Assam Pradesh Congress Committee kala kynjoh sha ka sngi kaba 29 ha ka jingpynlong ia ka jingiaid paidbah ha ka jylla hapoh Bhokakhat constituency.
Haduh palat 30 ngut ki nongialam ka seng Congress, kaba kynthup ia u Bhupen Borah, Gaurav Gogoi, Bismita Gogoi, Nurul Huda, Etuwa Munda, Rakibul Hussain, Assam Pradesh Mahila Congress Committee president ka Meera Borthakur kila wan iashim bynta ha kane ka jingiaid paidbah.
Kumjuh lah ruh ban kdew ba u CM Himanta Biswa Sarma ula wan poi ha Silchar na ka bynta ban iashim bynta ha ka jingialang cabinet ka ban long mynta ka sngi.Nalor kata la ong ruh ba na ka liang u CM Sarma un ai ruh ia ka jingkren sha ki lad pathai khubor hapoh DC office ha Cachar mynta ka janmiet.
Ha kawei pat ka bynta, na ka liang u CM Sarma ula leit ban buh ia u mawnongrim na ka bynta ka jingpynheh bad ka jingker ia ka projek shna surok ha baroh arliang jong ka Rangirkhal channel ne ka nala bah hapoh Silchar.
Ia kane ka projek ba la mang ha ka jinglut kaba T. 42.06 klur la pynkhreh na ka bynta ban maramot ia kane ka nala kaba ha ka jingjngai kaba 17 kilomitar kaba kit shibun bah ka um ha ka por lyiur bad kaba ju wanrah ka jingshlei um ha ki jaka sor.
