Itanagar, Risaw 10 : Ban pyniasoh sha ki jaka ba kyndong eh ka Jylla, ka Sorkar Arunachal Pradesh kala pynkhreh mynta ban shna ia ka surok ka ban pynibaroh asoh ia ki jaka khappud kiba don ha khappud ka ‘India-Tiber-China-Myanmar”.
Kane ka surok ka dei kaba la tip kum ka Frontier Highway, kaba jrong kumba 1500 Km bad ba don hapoh ka 20 Km na u Line of Actual Control (LAC) jong ki khappud bad kiwei pat ki Ri.
Kane ka surok kan pyniasoh ia ki shnong kiba kongsan eh ha ka jingiada ia ki jaka khappud kiba kynthup ia ka Tawang, Mago, Upper Subansiri, Upper Siang, Mechuka, Tuting, Dibang Valley, Kibithoo, Changlang bad Dong.
Ia kane ka project la pyntrei lyngba ka jingtrei shitom bad ka iatreilang jong ki Agency bapher bapher ba kynthup ia ka Border Roads Organisation (BRO), ka Ministry of Road Transport and Highway (MoRTH) bad kiwei kiwei ki Agency ka Ri.
Kane ka Frontier Railway kan jrong kumba 1500 Km nalor ka 1000 Km ka surok bala thmu ban pyntrei ha kaban pynkhlain ia ki lad pyniasoh hapoh ka thain.
Kat kum ka jingong ki Heh Sorkar, kane ka surok kan iasoh ruh bad ka surok Trans-Arunachal Highway ba dang iaid shaid shaid ha ka jingpyntrei.
Ka jingkongsan bad jingmyntoi jong kane ka Frontier Highway ka long kaba bun bha.
Hadien bala pyndep, kan long ka surok ba kongsan tam ha kaban pynsuk ia ka leit ka wan sha ki jaka khappud. Kan kyntiew ia ki lad pyniasoh surok hapoh ka Jylla nalor ban pyntyllun sted ia ki kam pynroi jong ki shnong kyndong.
Da kane ka project, ka Arunachal Pradesh kan don haduh lai tylli ki National Highway kata ka Frontier Higway, ka East West Industrial Corridor Highway bad ka Trans-Arunachal Highway.
Ha ka jingpyrshang ban pynkhlain ia ki lad pyniasoh, ka MoRTH kala dep ithuh haduh hynriew tylli ki interconnectivity corridor da ka jingthmu ban pyniasoh ia ka National Highway-15 ha Assam bad ka Trans-Arunachal Highway (NH-13) bad ka Frontier Highway (NH-913).
Baroh artylli ki Highway-ka Frontier Highay bad ka Trans-Arunachal Highway kan ai jingmyntoi bha ym tang ia ki bor shipai, hynrei kan pynthikna ia ka jingiaid lynti ba khlem thut ki bor shipai bad ki tiar ialeh sha ki jaka khappud nalor kan pynsuk ia ki paidbah ha ka leit ka wan bad ka jingwan poi ki kam pynroi ha ka thain.
