SHILLONG, Iaiong 09: U Symbud Myntri Rangbah ka jylla u Bah Prestone Tynsong hynne ka sngi Baar ula ong ba ka Physical Fitness lane ka jingbiang ka met ka phad bad bor met, ka long kaba kongsan tam ha ka jingthung kam ha ka Tnad Meghalaya Police.
U Bah Prestone ula kyntait ia ka jingkynnoh jong u MLA ka Liang Pyrshah na ka seng Voice of the People Party (VPP) Bah Adelbert Nongrum, ba ong ba ka jingpynmih ia ka jingpynbna lait kam pulit ha Meghalaya ka long kaba beaiñ.
Haba iakren bad ki nongthoh khubor, u Bah Tynsong ula ong ba u Bah Nongrum u khlem pule bniah ia ka Office Memorandum (OM) hashwa ban shu rai kut ba ka long kaba beain.
“U (Nongrum) la pule tang ia ka paragraph kaba nyngkong bad ula iehnoh ia ka paragraph kaba khatduh, kaba pynishai kdar ba katei ka OM kan ym treikam na ka bynta ki katto katne ki tnad sorkar kum ka Home (police), Forest and environment, ERTS bad kiwei kiwei”.
Ha ka 24 tarik u Kyllalyngkot, ka kynhun Myntri kala ai jingmynjur ia ka rta kaba rit bad kaba heh duh jongka jingthep kam ha ki 4 tylli ki tnad kiba kynthup ia ka Civil Defence & Home Guards, Excise, Registration, Taxation & Stamps (ERTS), Forest & Environment bad Home (Police) jongka sorkar jylla.
“Balei ngi pyrkhat ban leh ia katei, kadei namar ba ki don ki post ba ki nongthep kam la ki dei ki kynthei ne shynrang, lada pynjlan ia ka rta ka jong ki ne lada shim katkum ka OM jong u snem 2022 da kaba ong 37 snem hadien ba la dep pynjynsur ia ka rta, kaba mut kan long kaba eh shibun ha kaba iadei bad ka Physical Fitness” ong u Bah Tynsong.
“Kum ha ka police department, ngi donkam ia ka physical fitness lane ka jingbiang ka met ka phad bad ka bor met jong ki nongthep kam. Kaba nyngkong kin hap ban leit mareh, ka ba-ar kin hap ban pyndep ia baroh ki bynta jong ka physical fitness bad hadien ba la dep jied ia ki ba kin don ha ki post jongki, kin hap ban leit training biang bad ka training ruh kaba eh bha. Kumta ngi hap ban pynthikna ba kidei ban long kiba khlain ha ka met ka phad” ula ong.
U Bah Tynsong ula ong halor katei ka nongrim, ka sorkar kala rai da kawei ka jingmut ban pynthikna ba ia kum kitei ki jait Post dei ban pynlait na ka General OM.
“Kumta ka Central Recruitment Board jong ka Tnad Pulit kala dep pan ia ka jingmynjur na ka kynhun Myntri bad ka kynhun Myntri kala ai jingmynjur ha kaba iadei bad ka rta jong ki nongaplai kam katkum ka jingkdew kaba bniah ha ka Jingpynbna laitkam kaba khatduh. Te mynta na ka bynta ka Unarmed Branch Sub Inspector, ka rta kan long naduh 20 haduh 27 snem tam bad ka jingpynjynsur sa 5 snem kaba mut 32 snem ka rta, nalor kane ia ka Armed/Unarmed Branch Constable bad Firemen, Driver MPRO ka rta ka long 18 snem haduh 21 snem tam sa bad ka jingpynjynsur sa 5 snem kaba long 26 snem ka rta bad kaba khatduh kadei Follower kadei 18 haduh 27 snem bad ka jingpynjynsur sa 5 snem kaba long haduh 33 snem ka rta” la pynshai u Bah Prestone.
Ula ong ba kine kidei ki rta kaba ngi la ai ka jingmynjur bad leh hadien ba la dep ban iatai sani bad iasyllok bha bad kiwei pat ki sorkar jylla bad la shem ba kitei kidei ki rta kiba biang bha ha ka jingthungkam ha ka Meghalaya Police.
U Symbud Myntri Rangbah ula kyntu ia ki paidbah ba kidei ban ym pdiang ia ka jingkren jong u Bah Adelbert Nongrum.
“Nga kyntu biang sa shisien ia ki samla kynthei bad shynrang ba kim dei ban sngap ia ka jingkren jong u MLA, hynrei kidei ban ieng skhem beit bad ban long kiba la pynkhreh ban thep ia ki aplikeshon ki jongki lyngba ka Online” ula ong.
Ula pyntip ba ka sorkar ka dang ap ban ioh jingbit na ka Election Commission of India hakor katei ka mat.
“Shisien ba la ioh jingmynjur kumta ngin sa pyntip sha baroh kiba dei khmih ban sdangbia ka jingkhot aplokeshon Online bad la tyrwa ba katei ka jingthep aplikeshon lyngba ka Online kan kut ha ka 31 tarik u Jymmang 2024″ ula ong..
 Bah Adelbert Nongrum, ba ong ba ka jingpynmih ia ka jingpynbna lait kam pulit ha Meghalaya ka long kaba beaiñ.){kind=link}