Shillong Nailur 03: U Lat ka jylla C. H. Vijayashankar hynne ka sngi Baar ula ong, “Kum u nongshong shnong ka Mysore, ka long kaba eh ia nga ban ong ba kiwei pat ki jaka ki kham itynnad ban ia ka Mysore hynrei ynda nga la wan sha Meghalaya nga la shem pynban ba ka long kum ka bneng”.
“Nga hap kubur pat ia ka jingshisha ba ka Meghalaya ka long kum ka bneng” ong u Lat ka jylla ha ka jingleit jngoh ia ka Law Kyntang bad ia ka Khasi Heritage Village kaba don ha Mawphlang.
U Lat ha ka sien ba nyngkong hadien ka jingshimti ia ka shuki, ula leit iuhkjat ha Mawphlang ban leit jngoh ia ka Law Kyntang bad ka Khasi Heritage Village halor ka jingkhot sngewbha jong ka KHADC.
Ia u Lat ka Jylla la pdiang sngewbha da u CEM ka Khasi Hills Autonomous District Council Bah Pyniaid Sing Syiem, u Chairman ka KHADC u Bah Lamphrang Blah, u Nongialam ka Liang Pyrshah u Bah TW Chyne, ki Executive Member, ki MDC ki ophisar bad ki nongtrei jong ka Council, u Lyngdoh ka Hima Mawphlang bad kiwei kiwei.
U Vijayashankhar ula ong “Nga la long teng u Myntri ka tnad Forest & Environment jong ka Sorkar Karnataka bad nga tip bha ia ka jinglong kongsan jong ki khlaw. Ha ka por ba nga long kum u MLA bad u MP ka Lok Sabha, nga la long u dkhot jong ka Standing Committee on Forest”.
Haba ai jingithuh ia ka Meghalaya kum ka shlem jong ka jingpynmih dawai kynbat, u Lat ula ong “Nga lah pule iaka histori baroh kawei jong ka ri India bad nga sngewsarong ban ong ba lada dei ban don iaka shlem jong ka Ayurveda bad lada dei ba don iaka shlem Medicinal Plant, phi lah ban ong ba ka jaka kaba nyngkong duh ka dei ka Meghalaya kaba dei ka shlem jongka Ayurveda katba ka Western Ghats kan dei kaba wan baar hadien jong ka Meghalaya” haba bynrap “Ngi hap ban pyrkhat bha ia ka jingitynnad jong ka mariang hangne”.
“Ki jaidbynriew riewlum kidei kiba ieid bha ia ka mariang bad kim ju pynjot ia ka mariang bad kila hikai ia ngi kumno ban im bad ka mariang. Nga dei uba na Mysore, Karnataka bad ka kurim ka jong nga kadei na Coorg, kumta ngan ialam ia phi baroh kynthup ia u CEM bad ia ki heh ki hain sha Coorg bad ngan ialam ia phi 100 na ka 100 ba phin iohi ia ka jinglong jingman jong ka mariang kaba long hi kumjuh, la ka long ha ka riam ka beit ne ka riti ka dustur, ka rukom bam ruh ka long hi kumjuh bad jan baroh hi ki long kumjuh bad ngam shym la lap ban don kano kano ka jingiapher ia kaei kaba nga lap hangne bad kane baroh kadei ka kam jong u Blei” ong u Lat ka jylla.
U Lat ka Jylla ula kular ia ki paidbah ka Jylla Meghalaya ba un ai ia ka jingkyrshan kaba pura bad ong “Kat kaba phi donkam ia ka jingiatreilang na Raj Bhavan, ngin iadonlang beit bad phi”.
U Lat ka Jylla ula leit ruh ban iuhkjat hapoh ka Inspection Bungalow jong ka tnad Public Health Engineering bad iakynduh ia ki Heh ka Tnad PHE kiba la batai bniah ia u halor ka Greater Shillong Water Supply Scheme (GSWSS).
