Shillong, Nohprah 20: U Myntri Rangbah ka jylla Conrad K Sangma hynne ka sngi u la ong ba ka sorkar Assam ne mano mano ruh kim lah ban tei Beat House, ne Out Post ne Border Out Post hapoh u pud u sam ka Meghalaya.
Lah ban kdew ba haka 19 tarik mynta u bnai ki dkhot ka Dorbar Shnong Mukroh bad ka seng Khasi Student Union (KSU) kila kynnoh ba ka sorkar Assam kala sdang tei thymmai biang iaka Beat House hapoh ka shnong Mukroh.
Haba kren sha ki lad pathai khubor u Conrad u la ong ba haduh mynta um pat ioh jingtip ba ka sorkar Assam kala tei thymmai iaka Best House ha Mukroh hynrei shen un sa phah ktien sha u Myntri Rangbah ka jylla Assam ban pynthikna ba ka sorkar kam dei ban pynieng kino kino ki jait jingtei hapoh u pud u sam ka Meghalaya.
U Conrad u la ong ba naka liang ka sorkar jylla kan iakren biang bad ka sorkar Assam ba kum kine ki jait jingtei kim dei ban ieng ha u pur u sam ka jylla Meghalaya khnang ban nym jia shuh ki jingiakynad hapeng ki paidbah nong shong shnong jong baroh artylli ki jylla ha ki thain khappud.
“Ngan shong jingialang bad ka sorkar Assam ban iatai bad ban pynthikna ba ka sorkar jong kano kano ka jylla kam dei ban tei jingtei ha u pud u sam ka Meghalaya namar ngim kwah shuh ban iohi ba kan mih kano kano ka jingiakynad ka ban lah ban wanrah ka jingjia ba sngewsih kumba jia shen ha Mukroh” la ong u Conrad.
U Conrad u la pynksan ba ka shnong Mukroh ka hap ha Meghalaya bad naka liang ka sorkar Assam ruh kam don hok ban pynieng Beat House, ne Out Post ne Border Out Post hapoh u pud u sam ka jylla.
U la ïathuh ruh ba u la ïakren ïasyllok bun sien bad u Sarma ha ki ar sngi ba la leit bad yn don ki jingïakren ha ki sngi ban wan ban pynthikna ba kan ym don kano kano ka jingpynshit ne jingpynkhih, da kaba bynrap ruh ba kan don ka jingïakren jong kiba kham halor na baroh ar liang.
