Shillong, Nailur 24 : Ka Myntri ka Koit ka Khiah Kong Ampareen Lyngdoh ha ka sngi Ba-ar, kala pyntip ba ka Sorkar Jylla kam don jingthmu satia ban pynkynriah ia ka Opioid Substition Therapy (OST) Centre na Shillong Civil Hospital.
“Nga la iakren shisnem bha ha kato ka sngi, la pyntip sha nga bad kala don ka jingdawa ban pynkynriah noh ia ka OST nangne, hynrei sngewsih ka ain kam shah satia ia ngi ban iaid ha kane ka lynti” ong ka kong Ampareen haba iakren bad ki nongthoh khubor.
Ka Kong Ampareen kala ong “Ngi donkam mynta ban wad bniah, balei ba ki don kita ki jingduna hapoh ka OST. Ngi donkam ban wad bniah kiei ki lad ki lynti ban leh ban pynbha iaka jingtreikam ka Center”.
Kala ïathuh ba ka kynhun Drug Users Association ruh kila wan shakhmat daka ba phah daki Volunteers ban iatreilang bad ki bor pynïaid ka Hospital ban pynïaid beit iaid ryntih iaka OST.
“Wa shu beh ia ki briew bad buh ia ki ha ki synduk ba kham jngai na ka jinglah ban ioh jingiarap, kata kam dei ka rukom treikam” kala ong.
Haba kyntu iaka HYC ban iatreilang bad ka Sorkar, ka Myntri kala ong “Iarap ia ka sorkar, lada phi iohi ba ki don kine ki jingleh pyrshah ia ka imlang sahlang, ha ka jaka ban beh iaki, to ngin wad ia ka lad ban iarap ia ki. Kata ka dei tang ka lad kaba ngi hap ban pyniaid namar ym don da kumwei pat ka lad kaba yn shah da ka ain”.
