Shillong, Naiwieng 02 : Ka Iingkashari Meghalaya High Court, hynne ka sngi Balang kala hukum ia ka Sorkar Jylla ban pynthikna ha ka ban pynsajia ia ki briew ba donkti ha ka jyrsieh thied kali ka Tnad Pulit bad ban pynioh pat ia ka pisa ba pyndonkam bakla.
“La khmih lynti ba ia kane ka kam lah peitngor ha ka kyrdan ba halor eh ban pynthikna ha ka ban ioh biang ia ka pisa paidbah bala pyndonkam bakla bad ki briew ba donkti ki dei ban shah pynsajia” ong ka Division Bench haba shong bishar ia ka PIL bala mudui da u Bah Riewad Vicharwant Warjri.
Ka Iingkashari ka ong ba ka kaiphod bala pyndait lang ha ka affidavit bala file da u Home Secretary ka Jylla kala pynpaw ba ka Tnad kala dep shim ia ka sienjam ba donkam ban kynthup kynthup ia ka chargesheet.
U Advocate General ula pyntip ruh ba u nongshah kynnoh ula pan ia katto katne ki kot ki sla bad la aipor ruh ia u ban file ia ka statement da ka jingthoh halor ka chargesheet.
La dep ruh ban thung ia u Inquiry Officer bad haduh 43 ngut ki nongai sakhi la dep ban pynpaw ha ka chargesheet bad ki kot ki sla don jingiadei bad kane ka kam.
Namar kane, ka Iingkashari kala hukum ba ka jingtohkit kam dei ban pynnoh shiliang la ka dei sha ka Tnad Pulit lane sha u nongshah kynnoh.
“La kyrmen ba ka jingtohkit kan iaid kham kloi kat kaba lah bad khlem da noh shiliang sha ka Tnad ne sha u nongshah kynnoh” kala ong.
Ka Sorkar Jylla kala pyntip ruh ba kan sa shim ia ki sienjam ba donkam ba ia ka nongkynti jong une u nongshah kynnoh yn sa kurup noh namar ka jingpyndonkam bakla ia ka pisa kala kot ia palat T. 3 klur.
Ha kajuh ka por, ka Iingkashari kala rai ban weng noh ia ka mudotduma Contempt pyrshah ia u Home Secretary namar ia kane ka kam la shimkhia da ka Sorkar Jylla.
Ka Iingkashari kala buh ban shong bishar biang ia kane ka kam ha ka 25 tarik u Naiwieng.
