Nongpoh, Nailar 04 : Ka Khasi Hills Autonomous District Council (KHADC) Lailad Beat, ha ka sngi Saitjain, kala leit jynrat bad pom lut ia baroh ki jingthung jingtep jong ki san tylli ki Longiing jong ka Shnong Umladoh, Ri-Bhoi District halor ka jingkynnoh ba ki kyntur shapoh u pud u sam ka Council.
Ki Nongtrei ka KHADC kila leit ban jynrat lut ia ki jingthung naduh ki tynrai dieng kait, tynrai diengkwai, sohtrun, sohniamtra bad kiwei kiwei.
Ki san tylli ki Longiing kiba dei ki trai jong kitei ki jingthung ki kynthup ia ka kong Prin Umsong, kong Brina Sylliang, Kong Slis Lyngdoh, Kong Ormilis Lapang bad ka Kong Phiarnes Sylliang.
Kane ka sienjam ba shim da ka KHADC kala pynbitar lep ia kine ki longiing bad kumjuh ruh ki bor pyniaid shnong ka Umladoh namar ka jingkynnoh ba ki briew ka KHADC ka Lailad Beat, ki khlem pyntip ne aiktien ia kane ka kam ba ki leh sha kine ki longiing bad khamtam eh sha ki nongpyniaid Shnong.
Haba iakren bad Ka Shlem, kine ki longkmie kila pynpaw ia ka jingsngewsih kthang bad jingpangnud ban iohi ba ki jingthung jingtep ba kila rep shitom la bun snem, kila shu shah pom bad shah jynrat jubor khlem ka jingtip jong ki.
“Kane ka jingleh ka KHADC ka dei ka kam leh donbor bad khlem ka jingpyrkhat lem ia ki jingduhnong jong ngi” kila ong.
U Rangbah Shnong ka Umladoh Bah Wet Syngkli ula ong, kine ki longiing ki dei kiba im bad bsa khun da kaba shu rep shu riang bad ki dei ki longiing kiba kamai mynsngi bad bam da miet.
“Ka Dorbar Shnong ka pynrem jur ia kane ka jingleh donbor ka KHADC kaba dei thik kum ka jingiuh roit ia kine ki longiing baduk. Ngi dawa ia ki bor ba dei peit ban leh eiei ia kane ka jingleh donbor bad ai ka jingbishar kaba hok ia kine ki longiing namar kane ka apot ba ki mad” ong u Bah Syngkli.
U pyntp ba ha ka 1 tarik Nailar, ki Ophisar ka Tnad Forest ka KHADC kila wan mih ha Shnong bad bthah ia ki nongshong shnong ban weng lut ia baroh ki jingthung jingthep kiba dei hapoh u pud u sam ka Tnad.
Hynrei ula ong ba kine ki Ophisar ki khlem aipor eiei ruh em bad tang shisngi, kila wan thom da ka bor bad pyndonkam da ki mashin ban pom bad pynkhyllem ia ki jingthung baroh.
