Shillong, Naiwieng 28 : Ka Sorkar Meghalaya kala pynkhreh ban nang pynkhlain ia ka jingdon ki jingtei ba kongsan shabar ka Jylla bad u Myntri ka Tnad General Administration Department (GAD) Bah Sosthenes Sohtun, ula shong bishar iaki Meghalaya House ba thymmai ha Bengaluru bad Mumbai.
U Myntri dang shen ula hiar jurip ia ka Building ba ka Sorkar kala thied ha Bengaluru ka ban sa pynkylla sha ka Meghalaya House ba thymmai. Ula hiar jurip ruh ia ka jaka ha Mumbai, kaba ka Jylla ka thmu ban thied na ka bynta ban tei sa kawei kaMeghalaya House ban lah pynbit pynbiang ia ka jingdonkam u paidbah.
Ia u Myntri la synran da Superintending Engineer ka PWD (Building) M Nongpluh, ki nongtrei ka Meghalaya House ba don mynta, bad kiwei ki Heh Ophisar.
Haba kren sha ki nongthoh khubor, u Myntri ula ong ba ka Sorkar kala buh hakhmat eh ia ka kam ban pynbiang ia ki jing donkam ki nongshongshnong kiba leit sha ki sorbah ka Ri ban leit sumar jingpang, leit pule, leit trei, lane kiwei kiwei ki kam shimet. Ka jingpynbun ia ki Meghalaya House ha kylleng ki Jylla ka Ri, u ong, kadei ka kam ba hakhmat eh ha kane ka jingpyrshang.
Ula kdew ba ka nongkynti ba thymmai ha Bengaluru kan ai jingmyntoi bha ia ka jingnang bun ki samla pule bad ki samla ba leit trei na ka Jylla, kiba ju leit bha sha ki tech hub ban pule, interview bad aplai kam.
Halor ka jaka ha Mumbai, u Myntri ula kubur ba ka Meghalaya House kaba don mynta hapoh ka Sor ka long kaba la khap ngiah bad kam lah shuh ban pyndap ia ka jingdonkam u paidbah khamtam ki nongpang kiba leit phah sumar ha kane ka jaka.
Ula iathuh ba ka jingiakrenn bad ka Sorkar Maharashtra halor kane ka nongkynti ka dang iaid shakhmat. Ka Tnad GAD kan sa iakren bad kaMaharashtra ban iapynbeit ia ka dor ka mur kaba iahao, ka ban pynlah ia ka Meghalaya ba kan pyniaid shakhmat ia ka jingthmu na ka bynta ka Meghalaya House ba thymmai ha Mumbai.
 Bah Sosthenes Sohtun, ula shong bishar iaki Meghalaya House ba thymmai ha Bengaluru bad Mumbai.){kind=link}