Shillong, Lber 2: U Myntri ka Sorkar Pdeng ba khmih ia ka Tnad Social Justice and Empowerment Dr. Virendra Kumar, ula pynbteng ia ka jingwan jurip ia ka jylla Meghalaya bad leit jngoh bun tylli ki jaka bad lum ia ka jingialang ha Shillong, East Khasi Hills district hynne ka sngi Nyngkong.
U Myntri ula sdang ia ka jingwan jurip da kaba leit jngoh ia ka Government Girls’ Higher Secondary School (PM Shri School), Police Bazar, Shillong ha kaba ula iakren bad ki khynnah skul, ki nonghikai bad khmih ruh ia ka jinglong jingman kiba la tei lyngba ka PM Shri.
Nalor kane ula iakren bad kylli ia ki khynnah skul shaphang ka thong ha ka jingim ka jongki bad ia ki jingeh kaba ki mad ha ka jingim ha kaban beh sha ka thong kaba ki don. Ula pynshlur ia ki khynnah skul ban jam shakhmat ha ka jingpule bad ha ka sap ka phong kaba ki don bad ula iaroh ia ka jingshimkhia ki nonghikai ha kaban saindur bad ban ai iaka jingnang jingstad.
Ula leit ruh ban jurip ia ka Urban Primary Health Centre (UPHC) ha Mawpat bad khmih ia kiba wan shah sumar, ia ka jingsumar ia ki longkmie kiba pun khun bad ka jingai jingsumar ia ki khunlung bad kiwei kiwei bad ula iakren ruh bad ki nongai jingsumar bad kiba ioh jingmyntoi bad ula banjur ba dei ban pynkhlain ia ka jingai jingshakri bad ba kam dei ban don kano kano ka jingthud ha ka jingai jingsumar.
Ha ka Anganwadi Centre ha Mawdiangdiang, u Dr. Kumar ula khmih ia ka jingai jingshakri ha ka jingsam ia ki jingbam kiba tei bad ula iakren bad ki nongtrei Anganwadi, ki khynnah bad ki kmie.
Ha ka jingleit jurip ia ka New Hope De-addiction-cum-Counselling Centre, u Myntri Sorkar ula khmih ia ki jingdon jingem bad ki jingtei ha kane ka jaka sumar bad ula iakren ruh bad ki bor pyniaid bad kiba ioh jingmyntoi.
Ula iaroh ia ka jingdon jong ki vocational training program kum ka kam misteri bad kiwei kiwei ki kam kiba donkam ia ka sap ka phong kiba la pynlong da ka centre bad ka pynpaw ba ki jingai jinghikai ban lah ban kamai ki long kiba kongsan ha ki Rehabilitation bad ka jingpyniasoh bad ka imlang sahlang.
Ula leit ruh ban jngoh ia ka Child Care Institutions and De-addiction Campus ha Mawkasiang bad leit peit ia ki jaka sah bad ia ki Counselling Unit bad ula iaroh ia ka jingkhuid jingsuba ka jinglong jingman ka sawkun sawdong jong kane ka jaka.
Ha ka shnong Mawkasiang, u Dr. Kumar ula khmih ia ka jingpyntreikam ia ka Jal Jeevan Mission project bad iakren bad ki nongshong shnong halor ka jingkhmih bad jingsumar ia kane ka projek sam umbam umdih, ha kaba ki nongshong shnong kila pynpaw ba kane ka projek kala wanrah ia ka jingkylla ha ka jingim kaba man la ka sngi ka jongki.
U Myntri ula leit ruh ban jngoh ia ka Old Age Home ha Demthring bad ula iakren bad kiba sah ha kane ka jaka ryngkat bad ia ki bor kiba pyniaid ia kane ka jaka sah bad ula iaroh ia ka jingkhuid bad ia ka jinglah ban pynbiang ia ki jingdonkam bad ban sumar sukher da ka jingieid bad jingisynei ia kine ki riewtymmen.
Ula pynkut pat da kaba pynlong ia ka jingialang ha State Guest House, Shillong, ha kaba ula khmih ia ka jingpyniaid shakhmat ia ki prokram bad ki skhim jong ka Sorkar Pdeng hapoh ka district. Ki heh ophisar kila pynpaw halor ka jinglong jingman jong ka jingpyntreikam ia ki Scheme kiba kynthup ia ka Pradhan Mantri Awas Yojana, Pradhan Mantri Gram Sadak Yojana, Pradhan Mantri Krishi Sinchayee Yojana, Jal Jeevan Mission bad kiwei kiwei.
U Dr. Kumar ula kren halor ki sienjam ban pynkhlain ia ka rukom im ha ki thain nongkyndong hapoh jongka Viksit Bharat Gram bad ka banjur ban kyntiew ia ki mar kiba la pynmih da ki Self-Help Group (SHG) ban kiew ha ka jingkamai kajih bad ban pyniasoh bad ki iew bapher bapher.
Ula kubur ruh ia ka jingseisoh ka jylal Meghalaya ha kaban pynduna ia ka jingiap ki longkmie kiba punkhun bad ki khunlung kiba don hapoh kpoh bad ula banjur ba ka jingpyndonkam ia ka pisa lyngba ki scheme bapher bapher kadei ban long kaba biang ban pynthikna ba yn lah ban pyntreikam ha ka por kaba la buh.
U Dr. Kumar ula pynshai ruh ba ki scheme jong ka Sorkar Pdeng kadei kaba la pynwandur na ka bynta ka ri baroh kawei bad la pyntreikam ha baroh ki jylla da kaba iatreilang bad ki Sorkar Jylla na ka bynta ka jingbit jingbiang jong baroh ki nongshong shnong hapoh ka ri.
Halor ka jingsngewkhia ia ka jingpyndonkam ia ki jingdih kiba sniew, u Myntri ka Sorkar Pdeng ula ong, ba ka jinkynrei u droks kam dei kaba lah ban iakhun marwei da ka sorkar bad ka donkam ia ka jingiatreilang ryngkat ka imlang sahlang, ki niam bad ki kynhun jong ka imlang sahlang.
Ula batai ruh shaphang ka jingiaid shakhamt jong ka Nasha Mukt Bharat Abhiyan, ha kaba la pynlong bun bah ki jingpynsngewthuh paitbah ha kylleng jong ka ri bad ula pynpaw ia ka jingskhem jingmut ba ka jingshimkhia lang da ka imlang sahlang baroh kawei kan sa pynmih ia ka jingseisoh.
