Shillong, Nailar 04: U Chairperson ka Meghalaya Human Rights Commission (MHRC) u Justice T Vaiphei hynne ka sngi Thohdieng, ula leit ban jurip iaka District Jail and Correctional Home kaba don ha Jowai, West Jaintia Hills.
Ia u Justice T Vaiphei la synran lang daki dkhot ka MHRC, B Giri bad PJP Hanaman bad secretary F.M Dopth.
Ka Commission kala sakhi ba kane ka District Jail bad Correctional Home Jowai ka long kaba khapniah bad kala tam iaka jinglah ban set 120 ngut ki koidi namar ha kane ka jaka sah la don haduh 298 ngut ki koidi.
Ka Commission kala bthah ia u Deputy Superintendent jong ka District Jail bad Correctional Home Jowai ban pynkylla shipor iaka Hall jong ka Vocational Training kum ka jaka sah jong ki koidi naka bynta ban pynkylluid iaki jaka sah.
Ka Commission kala pynpaw ba ia ka jaka Training la dei ban kynriah shwa shaka Video Conferencing Room namar la shem ba ka kham heh ka jaka.
Ka Commission ka sngew ba ka sorkar kala donkam ban tei sa da kawei ka Building ban kham pynkylluid iaki jaka sah lane ki Ward.
Tang kawei ka jaka leit shabar ha man ki jaka sah (Ward) kaba buh jingeh naka bynta ki 50 ngut ki koidi kiba la shah set ha kawei ka Ward bad ka long kaba donkam kyrkieh ban tei jaka leit shabar thymmai naka bynta kawei ka Ward.
Ka Commission kala bthah ia u Deputy Superintendent ban pynbiang iaka kaiphod halor ka jingsahteng ki case pyrshah iaki koidi naka bynta ban ailad iaka Commission ban rah ia kine ki case sha ka Legal Service Authority pynsted ban pyndep tian bishar.
Kane kan dei ruh ka sienjam ban kham pynkylluid iaka patok. Ha kajuh ka por ka Commission kam sngewtynnad satia ban iohi ba u Medical Officer jong ka patok u khlem wan haka por ba wan jurip namar ki don bun ngut ki koidi kiba donkam ka jingkhmih haba iadei bad ka koit ka khiah.
