Nongpoh, Risaw 14 : Ka Hima Mylliem kynthup ka Raid Marwet bad ka FKJGP-North Khasi Hills, hynne ka sngi thohdieng, kila hiar jurip ia ka jaka ha shnong Umnowe jong ka Raid Marwet, ban pynlong kum ka jaka theh niut jong ka thain Byrnihat.
Kane ka kynhun jurip ka kynthup ia u Syiem ka Raid Marwet Ken Syiem, u Basan Nongkseh bad Basan Ummulong, ki Myntri ka Hima Mylliem kynthup ia u Bah K Langstieh, Bah S Sohtun lem bad ki Nongialam bad ki Dkhot jong ka FKJGP-NKH kynthup ruh ki Nongialam na ka Byrnihat bad Baridua Circle.
U paiem Ken Syiem bad u Basan Nongkseh kila pynpaw ia ka jingkmen ban iohi ia ka jingtrei shitom jong ki Nongialam ka FKJGP kiba la lahban pynioh ia ka jaka ban pynlong jaka theh niut jong ki shnong kiba hap hapoh ka Raid Marwet.
“Ka jingdon jong kane ka jaka kan iarap shibun ban wanrah ia ka jingkhuid jingsuba jong ki shnong ki thaw bad kan iada ruh ia ka jingbret pathar ia ki jakhlia sha ki rud ki kiar kiba lah ban ktah ia ka koit ka khiah ki Nongshongshnong” kila ong.
Kila pynpaw ruh ba kum ki Nongmihkhmat ka Hima Mylliem bad Raid Marwet, kin ai ka jingiatreilang ban pynurlong ia ka thong ban pynioh ia katei ka jaka.
“Shen ngin sa khot ia ki Nongialam Shnong bad ki Nongshongshnong ka thain ban pynshai halor ka jingdonkam ban don ka jaka theh niut kaban don ruh ia ki kor ki bor kat kum kajuh kaba mynta” kila ong.
U Bah Lumlang Mawnai, Vice President ka FKJGP-NKH ula ong ba ka jingshimkhia jong ka seng ban wad jaka theh niut ka dei halor ka jingbym lah peit ia ka jingiabret pathar ia ki jakhlia da ki riew paidbah ha ki rud surok bad kiwei kiwei ki jaka, kiba la pynsniew dur shi katdei eh ia ki shnong ki thaw bad ba lah ruh ban buh jingma ia ka koit ka khiah ki paidbah bad wat ia ka mei mariang.
Ka FKJGP ka pynpaw ïa ka jingsngewkmen kaba khraw halor ka jingshimkhia lang jong ki nongïalam ka Hima Mylliem bad Raid Marwet kiba la pynïoh ïa katei ka jaka ban pynurlong ïa ka jingangnud u paidbah ban ïoh ïa ka Solid Waste Management hapoh ka thaiñ Byrnihat bad ha Raid Marwet.
