Shillong, K’lyngkot 17 : U Symbud Myntri Rangbah ki kam Pohiing Bah Prestone Tynsong ha ka sngi Thohdieng, ula ong ba ka Sorkar MDA ba ialam da ka NPP ka bunkam ha ka jingpyrshang ban wanrah kham bun ki kam pynroi na ka bynta ka jingmyntoi u paidbah bad kam don por ban pynlut kai ha kaban jubab ia ki jingkynnoh ba khlem nongrim ki Liang Pyrshah.
Haba jubab ia ka jingkylli halor ka jingpynkhreh ka NPP ia ka elekshon MDC ha KHADC bad JHADC, u Bah Prestone ula ong “Ngam iohi satia ba kine ki jingkynnoh ba khlem nongrim jong ki Liang Pyrshah kan ktah ia ka party ha kane ka elekshon”.
Kat kum ka jingong jong u, kane kam dei shuh kaba thymmai ba ki seng sain pyrthei ba don ha ka Liang Pyrshah kin pynmih ia ki jingkynnoh ba laiphew jait sha ka party (NPP), kaba ialam ia ka Sorkar.
“La ka dei ka VPP ne kano kano ka party, ka dei ka kamram jong ki ban ong ia kata. Wat ma nga lada nga don ha ka Liang Pyrshah, nga hap ban ong ba kane ka Sorkar ka dei kaba bamsap bad kumne kumtai lem kumta phin shu jah kyrteng hi dalade. Phi ioh ia kaei kaba nga mut. Kumta, ngan ym pynlut por halor kine kiei kiei namar haba kut, nga ong ha phi ba kaba biang eh ban peit kan long ha ka 4 tarik Rymphang, ka sngi ianiew ia ki vite bad hangne phin sa sngewthuh” ong u Bah Prestone.
Haba kylli, u Symbud Myntri Rangbah ula ong “Kaei kata ka mat isih Sorkar kaba phi iakren?. Nga dang shu jer kyrteng ia ki project bala pyntreikam da mano? T.5000 klur tam nga tharai kam dei kaba kamkai bad lada phi iakren ia ka T.15000 klur ruh jong ka surok Express Corridor, phi lah ban pyrkhat ia kane ba ka Meghalaya, ka Jylla kaba rit, ngi ioh haduh katne ki project bad ki skhim. Balei ngi ioh? Ka dei namar ka Sorkar ka dei kaba treikam. Ngi la lah ban pynkohnguh ia ka Sorkar India, ta ka daw ngi la ioh ia kine ki kam pynroi”.
“Ngim pynlut por hangne ban kren ba utei uba long kumta, utei uba long kumtei, ngim don por ban leh ia kata. Ngi don por tang ban leit sha Delhi bad ka bowl bad bat kti ba sngewbha ban ai ia ngi la ka long kumno kumno ruh. Lada ngi dei ban nguh ia ki khlieh jong ngi ruh, ngi hap ban leh namar jong no? na ka bynta ka jingmyntoi ki paidbah ka Jylla. Ta ka dawn gam don por ban iakren halor kiwei ki seng sain pyrthei lane iano iano ruh hynrei ngi la duh thiah duh dem ba kumno ngin lah wanrah kham bun ki project, kham bun ki skhim sha ka Jylla jong ngi” ula ong.
Halor ka rai jong ki katto katne ki MDC ka NPP ban mih iakhun noh kum ki kyrtong shimet, u Bah Prestone ula ong “Ngam don eiei ban ong ia kane. Kane ka dei ka riti synshar paidbah. Phi don ia ka hok ban leh ia kata. Phi lah ban iakhun kat na kaba phi kwah la ka dei ka BJP ne kino kini ki party lane kum ki kyrteng shimet naba ka riti synshar ka Ri ka shah ia kane. Kumta ngam don ban ong eiei ia kane”.
