Shillong, Jymmang 27 : U Myntri Rangbah ka Jylla Conrad K Sangma ha ka sngi Balang ula ong ba um pat kren eiei halor ka nongrim jong u haba iadei bad ka Uniform Civil Code (UCC) tad hadien ka jingiohi ia ka draft kaba shisha, watla ula kubur ba u “don ka jingsngew shngain khyndiat” haba iohi ba ka ain UCC ha Uttarakhand bad Assam kim shym la ktah ia ki ain ki paid riewlum.
“Nga la kren shai bha halor ka UCC halor kawei ka nongrim bad kata ka nongrim ka long ban gam pat lah ban kren eiei halor kaUCC lada ngam pat iohi ia ka draft jong ka UCC” ong u Conrad.
Ula batai ba tang ka kyrteng ruh ka long kaba ka bym shai ka jingmut ba ngan kynthoh ia ka. “UCC ka dei ka Universal Civil Code. Kaei kaba kata ka UCC ka mut bad kiei kita ki ain ki ban long ryntih lang, kane ka dei kaba nga kwah ban iohi” ula ong.
U Myntri Rangbah ula ong ba ka jingpyrshah jong u haba nyngkong ka mih na ka jingsheptieng halor ka riti ka dustur jong ki riewlum. “Haba sdang haba ngi khmih ia ka UCC, ka dei ka kam kaba hap pyrkhat. Haba ki briew ki kylla ia nga halor ka UCC ha katei ka por, Nga on gem, ngim lah ban don ia ka UCC namar ngi dei ki riewlum bad ki ain riewlum ong ngi ki iapher” ula ong.
Hynrei, u pynpaw ba ka jingsngew kala kylla hadien ka jingbishar ia ki ain jong kiwei ki Jylla ba dang shen. “Mynta ngi la iohi ia dur jog ka bad kumno ka UCC ka wan ha ki Jylla bapher bapher. Nga kham sngew shngain mynta namar lada phi khmih ia ka UCC ha Uttarakhand lane la ka long ha Assam, kim shym la ktah ia ki ain ki riewlum” ong u Conrad.
“Kynsan kynsan mynta ka UCC kala wan na Assam bad Uttarakhand bad kila kdew shai hangne ba la pynlait noh ia ki ain ki riewlum, kumta kiei kiei baroh kila pher” ong u Conrad haba bynrap “Hynrei ka Meghalaya hi kan dang hap ban pule bniah ia kano kano ka jingtyrwa”.
U Conrad ula ong ba ka jingkhuslai ba jur eh na ka bynta ka Jylla ka dei ka jinglah ban ktah ia ka rukom ai jait sha ka Kmie. “Ngi don ka jingkhuslai ba ka rukom ai jait kmie jong ngi ka lah ban shah pynkylla noh bad ka Ain ka ri kan wan bad pynkylla kut ia ka rukom jong ki riewlum ka Jylla jong ngi ban ai jait sha ka Kmie” ong u Conrad.
“Nhi hap ban khmih shuwa ia kiei kiei baroh hashuwa ban gin kynthoh ne kren eiei halor ka UCC” ula ong.
 tad hadien ka jingiohi ia ka draft kaba shisha, watla ula kubur ba u “don ka jingsngew shngain khyndiat” haba iohi ba ka ain UCC ha Uttarachand bad Assam kim shym la ktah ia ki ain ki paid riewlum.){kind=link}