Shillong, Jylliew 20: Ki shipai BSF ka Meghalaya Frontier, kila pynshai ba ka jingjia ba jia hynnin ka miet ha Shnong Kuliang, East Jaintia Hills, kala wan jia namar ka jingiakhun pyrshah ia ka kam khaii tuh ia ka shini sha Bangladesh.
Kat kum ka kyrwoh na ki BSF, hynnin ka miet ha ka por 11 baje eiei, kumba 30-35 ngut ki nongkhaii Bangladesh bala iarap da ki briew na Kuliang, kila wan rung tuh sha khappud India lynba ka khappud ba khlem ker sainar jong ka Kuliang Border Outpost. Ka pyntip ba kine ki nong Bangladesh kila wan rung sha Kuliang ban shimti ia ka shini na ki nongkhaii ka shnong Kuliang.
Ki BSF ki iathuh ba haba ioh jingtip ia kane, ka kynhun ba kyrpang ki BSF kila her wut wut sha katei ka jaka bad katba ki shipai ki dang don ha lynti, ki nong Bangladesh kila phet sha Kuliang bad ha ka jingkthong, ki trai shnong ka Kuliang khnang ban ai lynti iaid ba shngain ia ki nongkhaii, kila mih ban ialeh pyrshah ia ki BSF bad kila lun maw naphang sha ki shipai nalor ka tim sim tim sang bad byrngem byrsit.
Ki pyntip ba ha kane ka jingiania, kawei ka Longkmie kala pom da u sdie ia uwei u shipai haduh ba ula mynsaw na ka kti ka mon bad uwei pat u shipai ula mynsaw na ka kti ka diang namar ka jingshah lun maw.
Ki shipai BSF ki pyntip ba mar iajia kane ka jingjia, kila pyntip ruh wut wut sha ki Pulit ka Umkiang Police Patrol Post kaba hap hapoh ka Lumshnong Police Station, ka East Jaintia Hills District.
Ha kane ka kyrwoh, ki shipai BSF kila pyntip ba ka Shnong Kuliang kaba don marjan bha bad ka khappud, ka dei ka jaka khaii tuh kaba jur bha. Ki nongkhaii na Kuliang ki ju lum ia ka shini hala ki jong ki Iing ne jaka ba ki buh, bad hadien ki sa khaii sha Bangladesh da ka jingiarap ki nongkhaii tuh ka Bangladesh kiba shim kabu ia ka jingbym ker sainar shiah ia ka khappud.
Ki pyntip ba tang naduh u bnai Kyllalyngkot 2024, ki shipai BSF ha ka thain Kuliang kila ioh ban kurup palat ia ka 1 lak kilo ka shini ba thmu khaii tuh sha Bangladesh.
Kila ong ba ka jingiatyngkhuh bad jingpyni bor jong ki trai shnong ka ju jia beit man ka por haba ki shipai BSF ki pyrshang ban tehlakam ia ka kam khaii tuh ha ki jaka khappud ka thain.
Halor kane ka jingjia ha Kuliang, la pyntip ba ki BSF kila ujor sha ki Border Guard ka Bangladesh haba iadei bad ka jing jam pud beain jong ki nongkhaii Bangladesh ha u pud u sam ka India.
