Shillong, Nohprah 08: Ka tnat pule puthi ka Sorkar Jylla kala jubab ia ka Hynñiewtrep Integrated Territorial Organisation (HITO) ba pyntip baka Sorkar Jylla ka dang ap ia ka bhah tyngka na ka Sorkar Pdeng ban pyllait ia ka bai bam (Scholarship) ki samla pule.
Kane ka jubab kala wan na ka ophis u Deputy Director of Higher and Technical Education lyngba ka shithi ba la phah sha ka Students’ Wing jong ka HITO ka 27 tarik u Naiwieng 2023.
Lah ban kdew ba ka HITO haka 13 tarik Naiwieng, 2023 ka la pan jingshai na u Secretary ka tnat pule puthi ka Sorkar Jylla u Ambrose Ch Marak halor ka jingslem ka tnat pule ban pyllait iaka bai bam (Scholarship) sha ki samla pule.
Ha ka shithi, u Deputy Director ula pyntip baka Sorkar ka la shimkhia bad phah jingthoh sha ka tnat Pule Puthi ka Sorkar Pdeng ha u bnai Jylliew bad ka dang phah jingthoh pynkynmaw biang ha u bnai Risaw, 2023.
Halor ,kane ka HITO kala pynpaw ba ka jingslem pyllait iaka bai bam (Scholarship) ka la pynlong ia ki samla pule ban mad ia shibun ki jingeh khamtam kiba shaniah na katei ka skhim ban siew ia ka bai pule jong ki.
U Assistant Secretary ka HITO Students’ Wing samla Kitshemphang Warjri ula ong ba shen ka seng kan sa leit ban iakren bad u Myntri Rangbah ka Jylla Conrad K Sangma lada ka Sorkar Jylla kan dang pynslem ban pyllait iaka Scholarship.
