Shillong, Jylliew 15 : Ka National Testing Agency (NTA) kala pyntip ba kan sa ailad biang ia ki samla pule ka Jylla Meghalaya kiba duh ialeh ia ka eksam Common Univeristy Entrance Test (CUET) namar ka jingshah pynngat thoh eksam sha ki centre kiba don shabar ka Jylla.
“Yn sa ailad biang ia ki samla pule ka Jylla, kiba duh iakhun ia ka eksam CUET namar ba ki ngat sha ki centre kiba don shabar ka Jylla” pyntip u Joint Secretary ka Tnad Education Bah D Lyngdoh hynne ka sngi Palei.
“…..ka kam ba iadei bad ka eksam CUET 2023 lah iakren bad ka Ministry of Education bad ka National Testing Agency, ka Sorkar India bad ka Sorkar Jylla, ha kaba la pyntip ba yn sa ailad biang ia kito ki samla kiba duh iakhun ia ka eksam namar ba ki ngat ha ki centre kiba don shabar ka Jylla Meghalaya kat kum ki data bala ai sha ka NTA” ong u Bah Lyngdoh ha ka kyrwoh.
Kane kala wan jia ruh tang shisngi hadien ba u Myntri Rangbah ka Jylla Conrad K Sangma, ula kyrpad ia u Myntri ka Tnad Education ka Sorkar Pdeng Dharmendra Pradhan ba un bthah ia ka National Testing Agency (NTA) ba kan pynbeit kyrpang ia ka eksam na ka bynta ki samla pule ka Jylla Meghalaya kiba la pynkhreh ban iakhun ia ka CUET ban ioh pule ha ki Central University kiba don ha kylleng ki Jylla ka Ri.
U Myntri Rangbah ula pyntip ha ka shithi sha u Myntri ka Sorkar Pdeng ba ka Sorkar Jylla kala ioh pdiang ia shibun ki jing ujor na ki samla puke ka Meghalaya halor ka jingshah pynngat thok eksam sha ki Centre ba don shabar ka Meghalaya kum ha Ranchi, Jharkhand, Jorhat, Dibrugarh, Kolkata bad kiwei ki Jylla ka thain Shathie ka Ri India.
Ula ong ba kane kala buh ia ki samla bad ki kmie ki kpa ha ka jingbym lah ngeit bad jingsohsat bad kala wanrah ruh ia ka jingeh kaba khraw ia ki samla pule kiba hap ban leit sha kitei ki centre nalor ban pyrkhat ruh sa ia ki jaka sah ha kine ki jaka.
U Myntri Rangbah ula pyntip ruh ba ki samla pule ka Jylla ki dang ioh pdiang ia ki Admit Card dang hynnin ka 14 tarik ban iakhun ia ka eksam CUET kaba la buh ban long ha ka 16 tarik Jylliew.
 kala pyntip ba kan sa ailad biang ia ki samla pule ka Jylla Meghalaya kiba duh ialeh ia ka eksam Common Univeristy Entrance Test (CUET) namar ka jingshah pynngat thoh eksam sha ki centre kiba don shabar ka Jylla.){kind=link}