Shallang, Nailar 13: Ka HYC Umdang area unit ha ka sngi thohdieng ka la lap ïa ka jingjot rathai jong ka Ophis ka tnad Animals & Husbandry Veterinary kaba don ha Shallang haduh ba ka tnad kam shym la buh nongtrei shuh ban shakri na kane ka Ophis.
Ka seng hapoh ka jingïalam jong u President u Samla Phersngi Nongbri, u la ong ba ha ka jingshisha la don ki Doctor kiba mut ban wan ban trei ha katei ka Ophis, hynrei kaba sngewsih ka long ba hadien ba kitei ki Doctor ki la wan poi ha katei ka jaka, ki lap ba ki ïing kim long shuh ban treikam bad kumjuh ki ïing sah kim long shuh ban sah. Kumta kim banse ba ki leit phai noh sha la shnong.
U Samla Phersngi u la pynpaw ka jingsngewsih jur ïa ka jingleh meinah jong ka sorkar ka bym ïohi ia ka jingjot jong kane ka Ophis haduh katne katne.
Ka seng ka dawa ban maramot mardor ïa katei ka ophis ba kan lah ban ai jingshakri ïa u paitbah ba ri jingri hapoh ka thaiñ. U Samla Phersngi u la pynpaw bad buh jingkylli kaei ka daw ba katei ka Department ka jia haduh katne.
Hato ka sorkar ka don jingtip ne em ïa kane, ne dei ba ñiew beiñ tang na ka daw ba ka dei ha jaka ba kyndong. Ka Seng ka dawa na u Minister jong ka tnad Animals & Husbandry Veterinary Bah Sanbor Shullai, ba un leh ei ei halor kane ka mat ba kongsan.
