Shillong, Jylliew 11 : U kyrtong ka MDA-II bad National Vice President ka NPP James K Sangma ula shah jied khlem ka jing ialeh pyrshah kum u MP ba marwei ka Jylla sha Rajya Sabha ha ka sngi Palei hadien ba kut noh ka por weng kyrteng ia ki kyrtong.
“(Hadien ka jingkhang noh ia ka kam weng kyrteng ha ka por 3 baje janmiet mynta ka sngi)….nga la iakynduh ia u Returning Officer bad ioh pdiang ia ka certificate jong ka elekshon” ong u James haba iakren bad ki nongthoh khubor.
Haba shim kum ka jingkitkhlieh kaba heh bha, ula ong ba un mihkhmat ia ka Jylla da ka jingaiti lut.
“Nga shu kwah ban ong ba nga sngewkmen bad ha kajuh ka por nga sngew burom ban kit ia kane ka jingkitkhlieh. Nga tip ba ka dei ka jingkit kaba khia bha ban mihkhmat ia ka Jylla ha ka Upper House bad haba tip bha ia ka kamram jong nga, nga kwah ban tynrong ia kane ka jingkitkhlieh da ka jingaiti lut bad jingleh hok” ula ong.
Halor ki jingeh ban mihkhmat ia ka thain Shatei Lam Mihngi ha Parliament, u James ula ong ba ka jingduna paid ka buh ha ka jingeh ban ioh bha ia ka por ban kren, hynrei un ialeh katba lah ban ioh ia ka por ba donkam.
U James ula buh thup ia ki kam ba un leh hakhmat eh ba kynthup ia ka jingpynrung ia ka ktien Khasi bad Garo hapoh ka Khyrnit ba phra ka Riti Synshar bad ka jingpyntreikam ia ka Inner Line Permit (ILP) nalor kiwei kiwei.
“Na ka liang ka Meghalaya ngi iatip baroh ba ngi la kyntur bha ban pynrung ia ka ktien Khasi bad Garo ha ka Khyrnit ba phra. Ki don bun ki ishu kiba la Meghalaya ka don haba phai sha ka sur ba ngi kwah ban pynsngew ha Parliament hynrei hooid, ki don ki ishu ha ka thain Shatei Lam Mihngi ruh kiba donkam ban hap kren” ula ong.
“Halor ka ILP, ngi iatip baroh ba kane ka dei ka ishu kaba la mynjur hapoh ka Iingdorbar Thaw Ain ka Jylla kum ka Resolution, kumta ka dei ka kamram jong nga kum u Nongmihkhmat ka Jylla ban pyntyllun shakhmat ia kane ka resolution khnang ba kan ioh ia ka sur haki saw kynroh ka Rajya Sabha. Hooid, Ngan buddien bha ia kane ka kam” ula ong.
Ula pynpaw ruh ba un iarap katba lah ha ka jingpyntreikam ia ki skhim ka Sorkar pdeng hapoh ka Jylla. “Ka kamram jong nga kum u Member of Parliament, nga lah ban shim ruh ia ka bynta kum u briew ban buddien ha New Delhi ia ki skhim ka Sorkar Pdeng, ki prokram ka Sorkar ha ki tnad bapher bapher”.
