Shillong, Nailur 30 : U MDC ka VPP na Nongthymmai Bah Winston Tony Lyngdoh, ula shah jied khlem kano kano ka jingia leh pyrshah, kum u Chief Executive Member (CEM) ba thymmai ka Khasi Hills Autonomous District Council (KHADC).
Ia kane ka elekshon la pynlong da ka jingiehnohkam u CEM barim Bah Shemborlang Rynjah namar ka jingbym don ia ka met kaba shait ba khlain. Ka Liang Pyrshah ka khlem sei kyrtong satia ban iakhun ia kane ka elekshon.
Ia kane la pynbna da u Chairman ka KHADC Bah Strong Pillar Kharjana ha ka Dorbar Kyrpang jong ka Council ba long ha ka sngi Ba-ar.
Ia u Bah Winston la synran sha ka shuki CEM da u Executive Member Bah Powell Sohkhlet bad u Nongialam ka Liang Pyrshah Bah Titosstarwell Chyne.
Ha ka jingialang pynkup burom la iashimbynta da jan baroh ki MDC kynthup ki 17 ngut ki MDC na ka VPP.
U Bah Strong ula pynpaw ia ka jingsngewskhem ha u nongialam ba thymmai bad ong “Nga sngew skhem ba hapoh ka jingialam jong phi, ngin ioh ia ka Executive Committee kaba skhem ka ban buh hakhmat ia ka bha ka miat u paidbah. Ka EC kan iatreilang ruh bad ki MDC ka Liang Pyrshah”.
Ula ai khublei ia ki paidbah ka Nongthymmai kibala jied ia u nongmihkhmat uba lah ban treikam.
Haba ai jingkren, u CEM ba thymmai ula pynpaw ia ka jingsngewnguh halor ka jingshaniah kaba la bynshet ha u. “Nga da sngewsih jur ia ka jingiehnohkam u CEM barim, namar ka jingbym khlain ka met ka phad. Ia ka jingshemphang bad jingpyniaid jong u yn sa duh noh shibun. Nga kyntu ia u ban buh hakhmat eh ia ka koit ka khiah jong u bad ban wanphai biang sha la ki kamram ynda u la lah.”
U Bah Winston ula ai khublei ia ki MDC ka Liang Synshar, u Nongialam ka Liang Pyrshah bad ki Dkhot namar ka jingkitbok ia u bad kumjuh ruh ia ka VPP kaba la jied ia u kum u CEM. Ula pynpaw ia ka jingsngewnguh ia ki paidbah ka Nongthymmai kiba la jied ia u kum u nongmihkhmat.
********
 ba thymmai ka Khasi Hills Autonomous District Council (KHADC).){kind=link}