SHILLONG, JUNE 13: Ka kynhun ki Doktor ka Tirot Sing Memorial Hospital, Mairang, kala lah ban leh ia ka Pyelolithotomy Operation kaba seisoh ha ka 12 tarik u Jylliew.
Ia katei ka Operation la ialam da ka Dr. T. Lyngdoh kaba dei ka Medical Superintendent bad Dr. I. Ryntathiang, Surgeon ha ryngkat bad ka kynhun kaba tbit, kila lah ban weng noh ia u maw uba heh ne u Large Calculus na ka Renal Pelvis, ka bynta ba hajan u khyllai jong I nongpang bad kane ka jinglah ban leh ia ka Operation kala long u mawjam jong ka jingjop kane ka Hospital ha kaban leh ia ka Surgery.
Katei ka operation ka long kaba kongsan ha kaban pynsuk ia u nongpang na ka jingpang jur bad na ka jingsniew jong u khyllai bad la leh ia katei ka Operation ha ka lynti kaba paka da kaba sumar sukher bha ruh.
Ka jingstad bad ka jingiatreilang kaba la pyni da ka kynhun ki nongsumar kala pyni ia ka jingtbit bad ia ka sap ka jongki ha kaban leh ia ka surgery bad ia ka jingaiti met bad mynsiem ia ka Tirot Sing Memorial Hospital.
I Dr. Lyngdoh bad Dr. Ryntathiang kila pyni ia ka nuksa kaba khraw kum ki nongialam bad ka kynhun kaba trei khlem shongthait na ka bynta ban ai jingsumar ia ki nongpang ym tang ba kila pynlong ia i nongpang ban ioh ia ka jingkoit hynrei kila pyni ia ka jingnang kiew shaphrang ha kaba iadei bad ka rukom ai jingsumar ha ka thain. Ka jingjop ha kaban leh ia katei ka Operation kadei ka nuksa ia ka jingbteng ka Hospital ban ai ka jingshakri kaba bha tam ia ka imlang sahlang.
Ka jingiaroh ka leit sha Dr. T. Lyngdoh, Medical Superintendent bad Dr. I. Ryntathiang, Surgeon bad ia ka kynhun jongka Tirot Sing Memorial Hospital, Mairang, Eastern West Khasi Hills halor katei ka jingjop kaba khraw.
