Kuala Lumpur, Naitung 31 : Ka phlim Garo ‘Rapture’ bala shna da u Dominic Sangma, kala ioh rah ia ka khusnam kum ka Best Cinematography ha ka 7th Malaysia International Film Festival (MIFF), 2024.
Ia kane ka khusnam laleit ban pdiang da u Cinematographer ka phlim u Toxo Xavier, uba la trei kynsai bha ia ka kam, kaba la wanrah ia ka nam jong kane ka phlim Garo na Meghalaya, ha satlak ka pyrthei.
Ka 7th Malaysia International Film Festival (MIFF) ka dei kaba la pynlong naduh ka 21 tarik Naituung haduh ka 28 tarik Naitung ha Kuala Lumpur, Malaysia.
Ka ‘Rapture’ ka dei ka phlim hapdeng ki paid Garo ka Meghalaya bad la pynwandur na ka khana jong u khynnah 10 snem uba don ia ka jingpang ka bym lah ban iohi haba dum. Une u Khynnah ula im ha ka shnong kaba don hapdeng ka jingsyier naba ka jingiai jah rngai ki briew ha ryngkat ki khana hamsaia ba saphriang halor ka jingdon ki nongrahbor kiba khaii iaki dkhot met ki briew.
Kane ka phlim ka dei kaba la kyrshan da u Hubert Bals, Visions Sud Est, bad ka Doha Film Institute. La pynmih ia ka da ka Dominic Sangma’s Anna Films ha ryngkat ka jingiatreilang bad ka Xu Jiangshang bad Sun Lun na China, u Anu Rangachar, Harsh Agarwa, Aditya Grover bad Stephen Zacharias kiba dei na India. Ka Eva Gunme R Marak na Meghalaya ruh, kala shim ia ka bynta kaba kongsan bha ha ka jingpynmih ia kane ka phlim.
Hadien shisnem ka jingiaid jong ka International Screening, ia ka phlim ‘Rapture’ yn sa pyllait ha ka sien ba nyngkong eh ha Tura, West Garo Hills ha ka 15 tarik Nailar. Ka jingpyni paidbah ia kane ka phlim ka dei kaba la apkhmih lynti kaba la slme bha jong ki paidbah ka thain.
, 2024.){kind=link}