Shillong, Naiwieng 12 : Ka Jylla Meghalaya kala jop ia ka takma ksiar ba nyngkong eh ha ka 2nd North East Olympic Games bad kane kala wan lyngba u samla Willbornson Wahlang uba la long u lahduh ha ka MTB Downhill Hardtail Men Race kaba don hynne ka sngi saitjain ha khlaw Malki.
Ka Meghalaya kala bat hi ia baroh ki kyrdan ha kane ka jait jingialehkai ha kaba ki nongniah cycle ka Jylla kila ioh ban khur ia ka takma rupa bad ka takma rnong ruh kumjuh lyngba u samla Amedius Therlang Marbaniang bad u Nicholas Syrti.
Tang ar second ka jingiapher hapdeng kine ki laingut kiba khur takma ha kaba u Willbornson ula pyndep ia ka race ha ka 2 minit 23 second katba u Amedius ula pyndep ha ka 2:24 minit bad u Nicholas ha ka 2:25 minit.
Ka Manipur kala nang ioh biang ia ka takma ksiar lyngba u Thokchom Tennyson Singh (2:08)ha ka MTB Downhill Full Suspension men’s race, da kaba tam ia u Dame Wanki Ha-o Suiam (2:15) na Meghalaya bad u Kshetrimayum Jack Singh (2:19) jong ka Manipur.
Ha ka cross country jong ki Kynthei, ka Lindum Iakia jong ka Arunachal Pradesh kala wan ba nyngkong da ka jingpyndep hapoh ka 9 minute 42.00 second, bad kiba wan ba-ar bad ba-lai ki dei na Manipur kata ka Pangambam Priya Devi (9:43.44) bad ka Haomon Urbashi Devi (9:48.10).
Ka jingsam ia ki prize jong baroh kine ki jingiakhun la pynlong hynne ka sngi saitjain ha kaba I Dr Ampareen Lyngdoh MLA ila long I kongsan. Kiba la iadonlang ki kynthup ia u Additional CEO ka NEOG 2022 bad Secretary ka Sorkar Jylla Bah Cyril VD Diengdoh.
Ki Nongniah cycle mynta kin ioh shongshait arsngi shuwa ka jingiakop niah cycle biang ba 80 Km na Shillong sha Mawthadraishan.
