Shillong, Nailar 27: U Symbud Myntri Rangbah ka Jylla Bah Prestone Tynsong ha ka sngi Ba-ar ula ong ba kam don satia kano kano ka lynti hapoh ka Ain ban pyllait ia kano kano ka jingtih marpoh khyndew nala tynrai na ka jingtreikam bad ki kyndon ka Meghalaya Minor Minerals Concession Rules (MMMCR),2016 lane ka Mines and Minerals (Development and Regulation) (MMDR) Act, 1957.
Haba jubab ia ka zero hour notice bala wanrah da u MLA ka BJP na South Shillong Bah Sanbor Shullai ha Iingdorbar Thaw Ain, u Bah Prestone ula ong “ Dei namar kine ki daw, ki kyndon ba donkam kynthup ki Rules bad ki hukum Iingkashari kiba teh ia ka Sorkar Jylla, ka Sorkar kala pyntreikam ia ka Meghalaya Minerals (Prevention of Illegal Mining, Transportation and Storage ) Rules 2022, ka bym shah ia kano kano ka jingkhaii ia ki minor minerals (shyiap/maw) khlem da ioh ia ka Transport Challan kat kum ka Form-H jong ka MMMCR, 2016, kaba la buh kyndon ba ki maw ki dei ban mih na ki quarry ne ki par kiba don ia ki legal Mining Lease lane Quarry Permit”.
“Halor kine ki hukum baroh bala pynmih da ki Iingkashari High Court bad Supreme Court bad ki Acts bad Rules, kam don lynti hapoh ka ain ban pyllait ia ka jingtuh ia ki minor minerals (shyiap/maw) nala tynrai na ka jingtreikam jong ka MMMCR, 2016 lane ka MMDR Act, 1957 lane ban khaii ia ki minor minerals kum u maw, shyiap bad kiwei, khlem da ioh ia ka Transport Challan kaba long kat kum ka Rules” ula ong.
Ula ong ba kane ruh ka dei ka jingsngewkhia ba ka jingpynkhein ia kine ki Rules kan mut b aka pynkhein ia ka MMDR Act, 1957 kaba long ka jingleh beain kat kum ka kyndon 21 jong ka MMDR Act, 1957.
Ha kajuh ka por, u Bah Prestone ula kular ban sa shim ia baroh ki sien jam ha kaban pynkloi noh ia ka jingai mining lease lane quarry permit sha ki nongaplai kiba la buh ia ki kot ki sla bad ka Tnad.
“Yn sa bthah ruh ia ki Nongtrei ka Tnad ba kin iarap lem ia kine ki briew ha kaban pyndap ia ki kot ki sla kiba donkam bad ban batai ruh ia ki lynti ba dei ban leh ha kaban aplai ia ki permit” ula ong.
Hadien ba la ioh ia ka mining lease lane quarry permit, ki nong aplai kin sa ioh ia ka Form-H hapoh ka Meghalaya Minor Minerals Concession Rules, 2016, ba kin khaii ia ki maw bala khlong lane kino kino ki minor minerals kum u syiap bad kiwei kiwei.
Nalor kane, u Bah Prestone ula pyntip ruh ba ka Sorkar Jylla ka dang bishar lada long kaba lah ban pyntreikam da ka single window agency.
,2016 lane ka Mines and Minerals (Development and Regulation) (MMDR) Act, 1957.){kind=link}