Guwahati, Naitung 11 : Ka jingiap jong ki briew na ka jingshlei um ha Assam kala kiew sha ka 84 ngut da ka jingiap biang sa 5 ngut ki briew ha kine ki 24 kynta bala leit noh.
Kumba 1.439 million ngut ki briew na ki 27 tylli ki District ka Jylla, kila shah ktah jur ha ka jingshlei um kaba shyrkhei tam ha une u snem ba mynta.
La iathuh ba haduh 159 tylli ki mrad khlad ba kynthup ia 9 tylli ki kyndad, kila iap ha Kaziranga National Park namar kane ka jingshlei um.
Kane ka jingshlei um kala pynngam ia 2580 tylli ki Shnong kiba hap hapoh ki 86 tylli ki revenue circle. Haduh 157,000 ngut ki briew kila don ha ki 365 tylli ki jaka sah ba shipor jong ka Sorkar.
Kat kum ka jingpyntip ka Field Director ka Kaziranga National Park (KNP), Sonali Ghosh la ong ba na kine ki 159 tylli ki mrad kiba iap, 9 tylli dei ki kyndad, 128 ki hogdeer (skei), 2 tylli ki swamp deer (sier), bad 2 tylli ki sambar. Nalor kine, sa 12 tylli ki hog deer, kawei ka swamp deer , shrieh rhesus macaque bad khun ksih kila iap ha ka jingsumar.
Ka pyntip ba ka Tnad Forest kala ioh ban pyllait im haduh 133 tylli ki mrad khlaw ha kane ka jingshlei um bad 111 tylli la pyllait biang hadien bala dep ai jingsumar.
