Shillong Jymmang 01: U Myntri Rangbah ka Jylla Conrad K Sangma ha ka sngi Balang, ula pynpaw ia ka jingsngewkhia halor ka jingkylla ka mariang bad ka jingbeh ka lyer khluid ha kylleng ka jylla Meghalaya bad ula lum ia ka jingialang ban shim ia ki sienjam ban leh eiei halor kane ka mat kaba ktah ia ka jylla baroh kawei.
U Myntri Rangbah ula ong, “Ha kylleng sawdong jong ka pyrthei kala don ka jingkylla jong ka suiñbneng bad ka jylla Meghalaya ruh kala mad ia kiba bun ki jingtynjuh na ka jinglong jingman naduh ka jingshit kyrang bad ka jingbeh ka lyer khuit (heat wave) ia kaba ym shim la don ba poi pyrkhat. Ka jingkiew kynsan jong ka jingshit kala pynthud bha bad ka jingpur sted ka ‘Heat Wave’ kala iaid ha kylleng jong ka Meghalaya bad kala pynmih ia ka jingeh”.
U Myntri Rangbah ula pynpaw iaka jingsngewkhia ba ki wahduid kila sdang ban rngad namar ka jingshit kyrang bad jingkhluid bad na kiwei de ki daw bad ula ong ba ki wahduid kiba ju don um bha hynrei mynta kila sdang tyrkhong lut bad kala don ruh ka jinghiar kynsan ka um ha ki wah.
“Da ka jingsngewkhia halor kine kiei kiei, nga la lum ia ka jingialang bad ka tnad Water Resources, Public Health Engineering (PHE), Forest & Environment bad ka tnad Soil & Water Conservation ha kaba ngi lah ia khmih bniah ia ka jinglong jingman ha ka jylla. Ngi la iakren na ka bynta ban shim ia ki sienjam kiba la lah ban pyntreikam shipor bad kiba lah ban pyntreikam shi rta bad ngi ngeit skhem ba kine ki kam kin iarap ha kaban wanrah ia ka jingkylla ha ki bnai ban wan” ong u Conrad.
Ula ong, ba ka jinglong jingman ka long kaba i ma bad kumta hap ban don bad shim ia ki sienjam ki bapher bapher ban leh eiei ia kane ka jingktah na ka jingkhluid ne Global Warming.
“Ka dei ka jingjia kaba ngi hap ban pdiang bad ngi hap ban leh ia kiei kiei kaba ngin lah ban ia imlang bad kane. Ngi hap ban leh katba lah ban leh eiei halor kane ka jingkylla bad ban pynduna na ka jingshah ktah ha ka Global Warming” ula ong.
U Myntri Rangbah ula kubur ruh ba kane ka jingjia kadei ruh namar ba kila don ki jingtih ki bapher bapher kiba la ktah ia ka mariang khamtam eh ia ki tyllong um.
“Ha ka Dorbar kaba la dep ha ka iingdorbar thawaiñ ka jylla, bun kila pynpaw ia ka jingsngewkhia halor ki kam tih marpoh khyndew bad kumno kala ktah ia ka jingkamai jakpoh, hynrei kum ka sorkar ngi la trei ha kata ka rukom, ban ym don ka jingnoh shilliang ha kaba iadei bad ka jingkamai jakpoh bad ka jingshah ktah ia kaba ngi hap ban dro ia u lain. Kumta ngi la buh shwa ia ka bha ka miat bad ia ka thong na ka bynta jong uba bun balang ha kaba iadei bad ka jingpynneh ia ki um ki wah bad kiwei ki mat kiba ktah ia ka mariang” ong u Myntri Rangbah.
Ula ong ba ka sorkar kala shim ia ki sienjam ha kaba kala khein be-aiñ ia ki katto katne ki jaka ban don kano kano ka jingtih marpoh khyndew bad kumta ki kam tih jingtih kila sangeh hynrei kila don pat ha ki katto katne ki jaka kiba la sdang biang ia ki kam tih hynrei la shim pat ia ki sienjam ban phah pynsangeh biang ia ki.
