Shillong Jylliew 23: Ki Pulit ha ka sngi u Blei kila kem sa ia u trai ka flat ba rieh ka Sonam Raghuvanshi, kaba don ha Dewas Naka ha Indore, Madhya Pradesh.
Une u briew u kyrteng u Lokendra Singh Tomar uba shong ba sah ha Gwalior, Madhya Pradesh. Ia une u briew la kem da ki Pulit ka Gwalior da ka jingkyrpad ka kynhun Special Investigation Team (SIT) ka Jylla Meghalaya.
“Ka SIT ryngkat bad ki pulit ka Gwalior ha ka 23 tarik u Jylliew, kila kem ha ka por mynsngi ia u Lokendra Singh Tomar na Gwalior. Udei u trai jong ka jaka sah ne Flat kaba don ha Dewas Naka, ka jaka kaba ka Sonam kala leit ban rieh ha ka por ba ka don ha Indore” ong u SP ka East Khasi Hills Bah Vivek Syiem ha ka kyrwoh khubor.
Une u briew ula mih na Madhya Pradesh ha ka 16 tarik u Jylliew ban leit sha Uttarakhand bad na Uttarakhand ula leit pat sha Gwalior ha ka 22 tarik u Jylliew.
U SP ula ong ba ka kynhun jongka SIT kala mih na Indore ban leit sha Gwalior ban kem ia une u briew uba suba donkti ban pynjulor bad buhrieh ia ki mar/sakhi kiba long kongsan ha ka jingpyniap ia u Raja Raghuvanshi.
U iathuh ba iane u briew yn sa rah tian bishar ha iingkashari ha Gwalior ban pan jingbit ha kaban wanrah ia u sha Jylla Meghalaya ban pynlong ia ka jingtohkit kaba bniah.
U SP ula pyntip ba ka SIT kala thwet ia une u briew halor ka jingsuba donkti ban pynduh pyndam ia ki sakhi bad ia ki sabut bad ban buhrieh ia ki tiar ki tar kiba long kiba kongsan ha katei ka jingjia.
Ula pyntip ruh ba ia baroh 3 ngut kiba la kem na Indore yn sa wanrah sha nongbah Shillong ha ka sngi Balang.
Kumban shu kdew ki pulit kila kem shwa ia u Silome James bad ia u Balbir Ahirbar.
