Shillong, Naitung 25: U Director General of Police ka jylla u Dr LR Bishnoi ha ka sngi Baar, ula ong ba ka jingpynhuri hura ha Tura ka dei ka kam kaba la iasuhbuit bad ba la pynkhreh bha, da ka jingthmu ban pynmynsaw bad shim ia ka jingim jong u Myntri Rangbah ka jylla u Conrad K Sangma.
“Katei ka jingpynhuri hura kadei kaba la iasuhbuit bad kaba la pynkhreh bha da ka jingthmu ban pynmynsaw ia u Myntri Rangbah bad ula kular ba yn set hapoh phatok ia baroh kiba donkti ha katei ka kam sniew” ong u DGP haba iakren bad ki nongthoh khubor.
Kila don 19 ngut kiba la shah kem kiba kynthup ia u nongialam ka seng TMC u Richard Mrong Marak uba la iakhun iaka elekshon MLA 2023 na South Tura bad u Salseng Ch Momin uba la iakhun iaka MDC elekshon kaba la dep na Siju constituency bad kine kila shah kem halor ka jingkynnoh ba kila donkti ha ka kam pynhuri hura.
Nalor kane la ithuh ruh ia ki 26 ngut lyngba ka jinglap ksai na ki video halor ka jingkawang maw bad ka jingthang ia ki kali.
U DGP ula ong, ba ka tnad syntiat kila lapksai iaka jingthmu ban shim ia ka jingim jong u Myntri Rangbah da kaba kawang na khlieh da ki maw ne bilor.
“Kila kynshoit ia ki paidbah ban pynmynsaw ia u Myntri Rangbah bad kila pynbor ban shim syndon iaka sienjam kiba heh ban shim syndon ia ka jingim. Kine ki jingleh jong ki samla ka kdew shai ba kadei kaba la dep ban iasylla bad kaba la dep ban thmu lypa ban pynmynsaw ia u Myntri Rangbah ka jylla” ong u Dr Bishnoi.
Ula ong ba ka jinglong jingman ka la long kaba jai jai mynta.
“Ngin ym map iano iano ruh kiba donkti ha katei ka kam thombor bad pyrshang ban thombor ia u Myntri Rangbah ka jylla bad ban pynjulor ia ki kali jong ki heh sorkar bad shen ngin set ia kiba donkti hapoh phatok” ong u DGP.
Ula pyntip ba ki pulit ki dang thwet jur ia kitei ki nongiasylla bad kila sdang ban pynlong iaka jingkhynra naduh ka miet jong ka Sngi Nyngkong.
U Dr Bishnoi ula pyntip ba kila ioh kurup ia kiba bun ki jingtip na ka jaka kaba la mih ka jinghuri hura kaba kdew shai ba katei ka huri hura kadei kaba la dep iasylla bad kaba la pynkhreh lypa da ka jingthmu ban thombor bad ban pynmynsaw ia u Myntri Rangbah ka jylla bad kala don ruh ka jingsam pisa shi sngi shwa ban long katei ka jingialang.
Ki pulit kila ioh ban kurup ia ki maw na ka jaka kaba la huri hura, 50 tylli ki siej ban bom ia ki pulit, 20 tylli ki knah, shi jarkan ka umphniang sharak, ki bilor kyiad bad ki jingpruid.
U DGP ula iathuh ba kila don 18 ngut ki Pulit bad CRPF bad kawei ka Homeguard kiba la mynsaw na ka jingshah ther maw ha ki paidbhur ha kaba 16 ngut kidei ki shynrang bad 2 ngut kidei ki kynthei.
Ula pyntip ba kila don 4 tylli ki kali kiba la shah wiangding bad 17 tylli kila julor naka jingshah ther maw bad na kine ki 17 tylli ki kali, 5 tylli kidei naka kynhun jong u Myntri Rangbah, kawei ka kali jong u MLA ka Williamnagar u Marcuise N Marak, kawei ka kali kaba dei ka jong u Deputy Secretary jong u CM, 2 tylli jong ki bor pyniaid district, 4 tylli jong ki pulit, kawei ka Ambulance bad 3 tylli ki kali jong ki riewshimet.
U DGP ula ong, watla kala don kajingther maw bad ka jingshah thang ki kali, hynrei ki pulit kim shym la siat iano iano ruh namar ba kim kwah ban pynmynsaw ia kiwei pat ki samla kiba jai jai, kiba don ha katei ka jaka bad iashimbynta ha ka jingiakhih.
U DGP ula pyntip ruh ba la pynjur shuh shuh iaka jingpahara ki pulit bad la phah ruh ia u IGP (Law & Order) ban khmih bniah bad ban peitngor ia ka jinglong jingman baroh.
Ula iathuh ba ki pulit kila dep ban rejistar iaka ejahar kaba la ujor da u Majistor halor ka jingjia ha ka Lah Sngi u Blei.
