Shillong, Nailar 28: Ki jingwad bniah kila pynpaw ba ki jingrit ki surok, ka jingpynieng kali harud surok bad ka jingnang bun ki kali ki riew shimet, ki dei ki daw ba hakhmat eh ba synniang sha ka jingkhap ngiap bad jingdheng kali ha ki surok ka sor Shillong.
Haba jubab ha Iingdorbar Thaw Ain, u Symbud Myntri Rangbah ba khmih ia ka Tnad Urban Affairs Bah Sniawbhalang Dhar ula ong ba ka Sorkar kala leh eiei mynta halor ki jingeh kiba don, ban lah pynduna ia ka jingdheng kali bad jingkhapngiah ka sor Shillong.
U pyntip ba ka Sorkar kala pynlong ia kiba bun ki jingwad bniah ban lap ia ki daw tynrai ba synniang sha ka jingkhapngiah ki surok ha sor Shillong.
Kine ki jingwad bniah ki kynthup ia ka blueprint ban pynduna ia ka jingkhapngiah ha Shillong bala pyn wandur da ka Tnad Home (Police) ha ryngkat ka jingiasyllok bad ka IIM Shillong bad ka Comprehensive Mobility Plan 2024 da ka Tnad Urban Affairs.
“Kine ki jingwad bniah ki pynpaw ia kine ki jingbym biang ha ka jingtehlakam ia ka jingkhapngiah ki surok. Limited road width : 80% ki surok ki don hapoh ka 7.5 m. Limited road capacity : Ka jingpynieng kali harud surok ka pynrit ia ka surok da 30-40%. Ka jingnang bun ki kali ki riew shimet kaba kiew haduh 17.5%” ula ong.
Nalor kane, u Bah Sniawbha u pyntip ba ka Sorkar kala kut jingmut ban pynbiang tarajur ia ka roi ka par bad ka jingpynneh ia ka mariang.
Ula ong ba ka rai ban pyniaid shakhmat ia ka jingpynheh surok bad ka jingshna ia ki jaka pynieng kali ba thymmai ha Ward’s Lake bad Phan Nonglait Park ki dei kiba la shim hadien ka jingbishar kaba bniah bha ia ka jingdonkam ki jingtei ha sor ban pynduna ia ka jingkhapngiah ki surok bad pynsuk ia ka leit ka wan jong ki nongshongshnong bad ki nongwan kai.
U Symbud Myntri rangbah ula pyntip ruh ba ka jingshna jingtei thymmai ha Ward’s Lake ka dang don ha ka jingpynkhreh ia ka DPR bad ka jingshna jingtei thymmai ha Phan Nonglait Park ka dang don ha ka jingpynwandur.
“Ngin pyrshang ban pynduna ia ka jingpom ia ki dieng. Kane ka long hadien ka nuksa ba jop jong ka Tnad Urban Affairs, kaba la shna ia ka jaka pynieng kali pyrshah ia ka NEIGRIHMS khlem da pom wat ia uwei u dieng” ula ong.
