Shillong, Jylliew 09 : Ki Pulit ka Jylla hynne ka sngi Nyngkong, kila iathuh ba ka jingthwet kala iaid shakhmat sa ia uwei u briew,(uwei napdeng ki 4 ngut) ha Madhya Pradesh bad Uttar Pradesh, uba donkti ha ka jingiapyniap ia u Raja Raghuvanshi.
U DIG Eastern Zone Davis Marak ula ong “Ka kynhun ki Pulit ka Jylla Meghalaya kila ioh kem ia laingut ki briew na Indore bad Uttar Pradesh hynnin ka miet. Hadien ka jingkem ia kine ki briew, ka kurim u Raja, ka Sonam Raghuvanshi kala wan ban pyndem hakhmat ki Pulit ka Ghazipur, Uttar Pradesh”.
Une u Heh Pulit ula kyrngah ban iathuh bniah ia ka rukom pyniiad ia ka jingtohkit hynrei ula kubor ba ka dei ka jingtohkit kaba seisoh.
U pyntip ba ia ka Sonam la kit noh sha Indore bad nangne yn sa wanrah pat ia ka sha Meghalaya.
Kine ki shikurim kiba la wan leh honeymoon sha Meghalaya, kila jah rngai ha ka thain Sohra naduh ka 23 tarik Jymmang.
Kine ki shikurim kila jah rngai hadien ka jingleit kai sha Nongriat, ka jaka ba don ka jingkieng diengjri ba armala. Ia ka met iap u Raja la ioh tam ha ka 2 tarik Jylliew najan ka Kshaid Wei Sawdong bad ioh tam ruh ia kawei ka wait, kaba pynsuba jur ia ki Pulit ba u Raja ula shah pyniap.
Da ka jingngam jylliew ki Pulit ia ka jingtohkit khamtam hadien ka jingjah rngai ka kurim, ka Sonam, ka jingtohkit kala shem ba dei ka Sonam kaba suhbuit bad thong pisa ia ki briew ba kin pyniap iala u kurim.
Ia kine ki briew ba ioh kem na Indore bad Uttar Pradesh la ioh ban kem na ki sakhi ba ioh lum lyngba ki phone call record, ka jingbuddien ia ka pisa tyngka bad ka jingbuddien ia ki jaka ba ki don hapdeng ka 22 tarik Jymmang ter ter.
Ki Pulit ka Meghalaya ki dang bteng ban wad sa ia uwei u briew ia uba la ngeit ba u dei uba donkti hakhmat eh ha ka jingiasuhbuit ban pyniap ia u Raja Raghuvanshi.
 ha Madhya Pradesh bad Uttar Pradesh, uba donkti ha ka jingiapyniap ia u Raja Raghuvanshi.){kind=link}