Shillong, Jan 27: Ka Myntri Sorkar kaba long ruh ka Nongaiktien jong ka sorkar jylla Kong Ampareen Lyngdoh hynne ka sngi Nyngkong, kala pynthikna ba ia ki 6 tylli ki jaka kiba dang sahteng ban pynbeit ia ka jingiakajia pud yn lah ban pynbeit noh hapoh u snem 2028.
Haba iakren bad ki nongthoh khubor, hadien ka jingwan synran iala u kurim Bah Fantin Lakadong uba la thep kyrteng ban iakhun ia ka elekshon MDC na Laitumkhrah-Malki, ka Kong Ampareen kala ong, “Ngi pynthikna ba ka mat kaba iadei bad ka khappud yn pynbeit noh hapoh u snem 2028”.
“Ngin pynthikna ruh ba kan ym don kano kano ka jingiabujli jaka bad kan ym don ka jingpynkhein ia ka Land Transfer Act,”kala bynrap.
Kala kyntu ia ki paidbah ka rilum Khasi bad Jaintia ba kim dei ban shah ialam bakla ha ki seng sain pyrthei kiba don ha ka liang pyrshah, kiba la shu kynthoh khlem ka nongrim.
“Ngi dei kiba la shah jied ha u Blei ban iada ia ki jaka ki puta bad ia ki paidbah. Ngi don hangne ban shakri bad ban pynthikna ia ka roi ka par jong ki paid riewlum bad ia ka khyndew ka shyiap” kala ong.
“Kadei ka kamram jong ki Liang Pyrshah ban kynnoh ia ki jingkynnoh kiba laiphew jait, hynrei katei kan ym ktah pat ia ngi ban iaid shakhmat bad ban bteng ban trei bad ban shakri ia ki paidbah bad iaka jylla. U Blei un btin lynti ia ngi” kala ong.
Kala ong ba ka NPP kan ialeh ha kaban kiar ban kawang ktieh pyrshah ia kiwei pat, ka Myntri kala ong “Hynrei ngi kwah ban pynkynmaw ba ka khyndew ka shyiap kam dei satia kaba la longtrai tang da kawei ka seng sain pyrthei, hynrei kadei ka jong ngi baroh lang”.
Ka Kong Ampareen Lyngdoh kala pynpaw ruh ia ka jingskhem jingmut ba ka seng NPP kan ioh ia ka jingkyrshan na ki paralok kiba iatreilang ha KHADC bad ha JHADC.
“Ki don katto katne kiba sngewmong haban gi ong khlem ka jingkyrshan ka sorkar jylla, kan long kaba eh ia kano kano ka seng ban thaw ia ka Executive Committee kaba thymmai. Hynrei ka NPP kan ai jingkyrshan ia ki paralok kiba iatreilang bad ka ha KHADC bad JHADC,” kala kam.
Ha kawei pat ka liang, ka Kong Ampareen kala iaroh ia la u kurim b aula trei shitom bha bad kala ong “U (Fantin) yn iai bteng ban trei shitom shuh shuh. Ym dei tang u kurim jong nga hynrei u dei ruh u nongialam. Yn bteng ban treo shitom bad kum ki shi kurim ngin iatrei shitom lang”.
“Une u kyrtong NPP udei uba nyngkong eh ban leit thep kyrteng hynne ka sngi namar ba u pynpaw ia ka jingshisha ba ka seng ka da shimkhia tyngeh ia kane ka kam” kala ong.
“Ka NPP kala rai ban kiar na ka jingiakwang ktieh bad ngin leit ban pynshai ia ki kam kiba bha kiba ka seng kala leh. Ka MDA kala noh synniang shi katdei eh” la ong ka Myntri Sorkar.
