Shillong, Nailur 04 : U Myntri Rangbah ka Jylla Conrad K Sangma bad Myntri Rangbah ka Assam Himanta Biswa Sarma, ki lah ban pynbteng biang ha u bnai Risaw, ia ka wat ba-ar jong ka jingiakren ban pynbeit noh ia ka pud u sam jong ki 6 tylli ki jaka iakajia ba dang sah.
Haba kren bad ki nongthoh khubor ha ka sngi Balang, u Conrad ula pyntip ba ula dep iakren ia kane ka kam bad u Myntri Rangbah ka Assam ha ka jingiakynduh iabamja lang la lai taiew lane shibnai mynshuwa.
“Ngi la iarai lang ba ngi khmih lynti kaba kloi eh lehse ha u bnai Risaw, ngi dei ban lah pynlong biang ia ka jingiakynduh ban iakren ia kane ka kam” ula ong
Haba pynpaw ba ka wat kaba ar ka dei kaba kham jwat ban iapynbeit, u Myntri Rangbah ula ong “Namar kata, ngi la phikir bha haba ngi jam shakhmat kum ha ka thain Langpih, Psiar, Khanduli, Block-I bad Block II namar ngi sngewthuh ba ki don shibun ki jyrwit jyrwat. Kam dei kaba suk kum ka wat kaba nyngkong”.
“Namar kata, watla ka jingthmu bad jingkwah jong ngi ka long kaba skhem bha kumba long nyngkong hynrei namar ka jinglong jingman ha kine ki jaka, ngi kwah ban da leh sani bad phikir bha katba ngi dang jam shakhmat khnang ban gin lah ban pynbeit ha ka rukom kaba dei bad ha ka lynti ka ban pdiang da baroh” ula bynrap.
Ka bynta ba nyngkong jong ka wat iakren ia ki kam kajia pud kaba ar hapdeng ka Meghalaya bad Assam, kala long ha ka 23 tarik Jymmang, 2023.
Ki hynriew tylli ki jaka kajia pud bym pat pynbeit ki kynthup ia ka Langpih, Borduar, Nongwah-Mawtamur, Deshdoomreah, Block-I & Block-II, bad Khanduli-Psiar.
