Shillong, Nailur 04 : Ka Sorkar Meghalaya bad Assam kila rai ban thung da ka Joint Committee ka ban khmih ia ki kam kiba la pynpaw da ka Assam pyrshah ia ka jingtreikam jong ka University of Science and Techology, Meghalaya (USTM).
Haba pyntip ia kane hynne ka sngi Balang, u Myntri Rangbah Conrad K Sangma ula ong “U Myntri Rangbah ka Assam bad ma nga, ngi la rai ha ka jingiakren ba ngin buh ia ka Joint Committee kaba rit ha kaba ki Ophisar na baroh ar Jylla kin iadonlang bad kin khmih ia baroh ki bynta kiba la pynpaw ia ka jingsngewkhia da ka Assam”.
Lah ban kdew hangne, dang shen u Myntri Rangbah ka Assam Himanta Biswa Sarma ula kynnoh ia ka USTM ba ka dei ka daw bah halor ka jingshlei um jong ka Nongbah Guwahati.
Ula kynnoh ba ka jingpom dieng pathar bad mait pathar ia ki lum ki wah ha USTM kala wanrah ia kane ka jingshlei um kaba ula ong ba ka dei ka “Flood Jihad”.
Namar kane, u Conrad ula ong ba ki Chief Secretary jong ki ar Jylla kila iakren ban pynbit pynbiang ia baroh ki jingdon kam ha kaban thung ia kane ka Committee.
“…baroh kine ki jingpynpaw na ka Assam yn sa iakren hapoh kane ka Committee bad ngi kyrmen ba ngin lah ban pynbeit ia kiba bun kiei kiei” ula ong.
Haba kylli, u Myntri Rangbah ula pyntip ba ka Sorkar kala ioh pdiang ia ka jingthoh na Assam hadien ka jingiakren bad u Myntri Rangbah ka Assam. “Ngi kyrmen lehse hapoh ka shitaiew, kane ka committee kan sa mih” ula bynrap.
