Nongpoh, Nohprah 3: Ia ka suk ka sain la lah ban pynneh biang ha ka shnong Maikhuli kaba don ha khappud ka Jylla Meghalaya bad Assam, hadien ba ki nongmihkhmat jong ka Joint Peace Committee na baroh artylli ki jylla kila lah ban tuklar bad pyniasoi ia ka jingiatehkular hapdeng ki nongshong shnong jong kitei ki ar jylla hynne ka sngi Baar.
Kane ka jingwan tuklar kala jia shi sngi hadien ba mih ka huri hura ha Maikhuli namar ka jingwan pynjulor ki nong Assam ia u mot thoh kyrteng jong ka skhim MGNREGS ba pynieng hajan ka pung dohkha jong ka Maikhuli.
Kine ki nong Assam kila tabain da ka rong iong ia une u mot thoh kyrteng, kaba la pynmih ia ka jingiashrut hapdeng ki nongshong shnong ka Maikhuli bad u riewshimet na Assam.
Da kaba sngewkhia halor katei ka jingjia, u MLA ka Jirang uba dei ruh u Myntri ka Sorkar Meghalaya Bah Sosthenes Sohtun mardor ula bthah ia ki bor district ka Ri-Bhoi bad ki pulit ba kin shimkhia mardor ha ka ban tem ia katei ka jingjia. Kane kala lam sha ka ban wan poi mardor ki dkhot jong ka Peace Committee na baroh artylli ki jylla bad ban lum ia ka jingialang hynne ka sngi Baar ha Maikhuli.
Ia kane ka jingiakren iasuk la ialam da u Bah Eric Dkhar u Majistor ka Ri-Bhoi district bad u Topash Saikia na Assam, ryngkat bad u Rangbah Shnong ka Maikhuli u Nicholas Marak, ki nongialam shnong bad ki nongmihkhmat na ki kynhun bad ki seng na baroh artylli ki jylla.
Ha katei ka jingialang, ka committee kala shimkhia ia ka jingleh jong uwei u riewshimet uba pyrshang ban pynmih ia ka jingiapher jingmut hapdeng ki paitbah na kitei ki ar tylli ki jylla kiba sah ha khappud. Kila iarai lang da kawei ka jingmut ba ki nongshong shnong bad ki nongialam na baroh artylli ki jylla kin iasoi noh ia ka jingiatehkular ban ban ym mih shuh kum katei ka jingjia.
Ka jingialang kala ai jingmynjur ruh ban pynneh biang ia ka jingpynieng ia ki post elektrik kiba la shah pynjulor noh ha kine ki khyndiat bnai kiba la dep bad ban pynneh biang ia u mawnongrim jong ka skhim MGNREGA ia kaba la pyrshang ban pyndam.
U Bah Sosthenes Sohtun ula pyntip ba ula shimkhia mardor ban pynsngew sha u Myntri Rangbah ka jylla u Conrad K. Sangma ia katei ka jingjia bad hadien kane ki Deputy Commissioner na baroh artylli ki jylla kila shah bthah ba kin iatreilang bad ban pynthikna ban pynneh ia ka shongsuk bad ia ka jingshngain ha ki shnong kiba don ha khappud.
Ka jingiasoi ia ka jingiatehkular kadei ka dak kaba long kongsan bha na ka bynta ban pynneh ia ka jingshongsuk bad ka jingiatreilang hapdeng kitei ki jaidbynriew kiba ia sah lang ha ka thain khappud.
