Shillong, Jylliew 09 : u Chairman ka Regional Committee ka West Khasi Hills Bah Paul Lyngdoh hynne ka sngi Thohdieng, ula pyntip ba ka Committee kan sa leit iuhkjat shen sha ka District ban pynlong ia ki jingialang bad ki Kynhun bapher bapher ha kaban iakren ia ka jingiakajia pud hapoh ka Langpih Sector.
“Ngi lah ban leit iuhkjat sha West Khasi Hills ha kine ki 10 sngi ban wan. Ngin sa buh ia bun tylli ki jingialang bad ki Khlieh Nongsynshar bad ruh ki Khlieh jong ki Bor pyniaid District ka West Khasi Hills bad ka lah ban shimpor ia ngi kumba 2 taiew eiei” ong u Bah Paul uba dei ruh u Myntri Sorkar haba iakren bad ki nongthoh khubor.
Kane kala mih ruh hadien ba u Myntri Rangbah ka Jylla Conrad K Sangma bad u Myntri Rangbah ka Assam Himanta Biswa Sarma, dang shen kila sdang ia ka jingiakren pynbeit pud jong ka wat kaba ar ban pynkut noh ia ka jingiakajia ha ki 6 tylli ki jaka ba iakam trai da baroh artylli ki Jylla.
Kine ki dei ka Langpih kaba don ha West Khasi Hills, ka Borduar, Nongwah-Mawtamur, Deshdoomreah, Block-II kiba don ha Ri Bhoi District; Block- I, Psiar – Khanduli kiba don ha West Jaintia Hills District.
Haba kylli kumno ka Sorkar kan pynthikna ba ki jingmih ki jingiakynad khari khari ha khappud kin ym ktah ia ka jingiakren pynbeit pud, u Bah Paul ula ong “Kane ka dei ka dei ka kam kaba jyrwit jyrwat bha hynrei ngi kwah ban jam shuwa shakhmat bad ka lynti jong ka Sorkar hi ka long ban ioh shuwa ia ki jingai jingmut jong ki Nongshongshnong ka thain, kaba dei ka sienjam kaba biang bha”.
Ula kular “Ngin sa pyrshang katba lah ban pynthikna ba ki jingjia thombor kin sangeh noh bad ia kane, ngin sa leh iala ka kamram. Nga la dep kren ia u Myntri kam Pohiing ka Jylla ba ngi dei ban lah ha kaban pynkhlain ia ka jingiaid pahara kham kloi ha ki jaka khappud jong ki District ka Jylla”.
Haba phai hi sha ka Langpih, u Bah Paul uba dei ruh u EM ka KHADC ula ong “Kumba phi tip, wat ka KHADC ruh kala dep mynjur ia ka project ban buh ia ka Police Outpost ha Langpih bad nga tharai ba ngi dei ban pyniaid shakhmat ia ka kam”.
Ha kajuh ka por, u Myntri ula ong ba ka Regional Committee kan sa pynkhreh ruh ia ki kot ki sla ban pynkhlain ia ka jingkam jong ka Jylla ba ka Langpih ka dang hap ha Meghalaya.
“Ngin sa iakynduh ia ki Kynhun bapher bapher bad kham kongsan eh ngin shong bishar ia ki kot ki sla bad lada ngi ioh lei ia ki kot ki sla kiba treikam na ki trai shnong, kine khlem pep kin nang pynkhlain ia ka jingiasaid ha kaban pynhap ia ka Langpih sha Meghalaya” ula ong.
