Jingbujli Myntri Sorkar | “Ki MLA ka UDP kim shym la iatehkular, tang ka party kaba lah ban shimrai” : Kyrmen

Kloi u Bah Kyrmen ban hiar shuki lada rai ka Party ban bujli Myntri

Shillong, Jylliew 30 : U Nongialam ka United Democratic Party (UDP) bad Myntri Sorkar Bah Kyrmen Shylla ula pyntip ba kam shym la don kano kano ka jingiateh kular hapdeng ki 12 ngut ki MLA ban iashimti bujli ia ki artylli ki shuki Myntri ha ka Sorkar haba bynrap ba tang ka party kaba lah ban shim rai lada ka sngew donkam ban bujli ia ki Myntri na ka UDP.

“Naba kam shym la don kano kano ka jingiateh kular, ka Party ka lah ban shim rai ha kano kano ka por. Ngim donkam ban ap ia arsnem shiteng lane lehse ngim donkam ban shim rai wat hadien arsnem shiteng ruh. Ka party ka don ia ka hok ban shim rai ha kano kano ka por lada ka sngew donkam” ong u Bah Kyrmen haba iakren bad ki nongthoh khubor.

U Bah Kyrmen, uba bat ia ka tnad Excise, Revenue bad Disaster Management, ula ong ba ka kam ban bujli ia ki Myntri ka dei ka bym pat ju iakren satia hapoh ka party.

Ula bynrap “Lada kala don ruh ngim don jingsngew eiei naba ngi baroh ki 12 ngut ki MLA ngi long kum shipara. Lada uwei u para/hynmen u ioh jingmyntoi, lada uwei u leh kham bha, ngi baroh ngi iakmen lang”.

U Bah Kyrmen u pynpaw ia ka jinglong ba kloi ban hiar shuki kum u Myntri lada bthah ban leh da ka party.

“Watla katta, lada ka party ka sngew ba ka donkam ban ai noh shawei, da kaba jingkmen ngin aiti noh ia ka. Ngi long kum shipara, ngim ju iashrut para ma ngi. Ngim ju ialong nongshun ha kajuh ka iing bad kane kan ym jia ruh hapoh ka party jong ngi” ula ong.

Ha ka 24 tarik Jylliew, u Myntri Rangbah Conrad K Sangma ula pynpaw ba u lah ban wanrah ia ka jingbujli kam ha ka kynhun Myntri lada dawa ka kam.

Kane ka jingkren jong u kala mih halor ki khubor hamsaia ba ka lah ban don ka jingkylla ha ka kynhun Myntri namar ka Sorkar MDA-2 ba ialam da ka NPP kan sa dap shen ia ka jingsynshar ba arsnem shiteng.