Jingangnud Article 371 ka VPP |Dang khlain ka Sixth Schedule, ka lah ban thawain ban iada ia ka Jaidbynriew : Pyniaid

Shillong, Rymphang 19 : U Chief Executive Member (CEM) ba mynta ka KHADC bad kyrtong ka NPP na Nongthymmai Bah Pyniaid Sing Syiem ula pynskhem ba ka Sixth Schedule ka Riti Synshar ka Ri, ka dei kaba kham khlain ban ia ka Article 371 ban iada ia ka Jaidbynriew.

“Ka Sixth Schedule ka don ia ki lai tylli ki paia-ka Executive Power (bor treikam), Legislative Power (bor thaw ain) bad Judiciary Power (bor shim bishar)-kaba ka Article 371 kam don satia” ula ong.

U Bah Pyniaid ula pynshai ia kane sha ki paidbah ba kin nym biej ia kawei ka seng sain pyrthei (VPP) kaba kwah ban wanrah ia ka Article 371 ha Jylla ban pynduh noh ia ka Sixth Schedule ne ka District Council.

Une u CEM ula kren ia kane ha ka rynsan ialap elekshon hynne ka sngi Balang ha Pohkseh, ban pynkut syndon ia ka jingia lap elekshon.

Kat kum ka jingong jong u, kane ka elekshon ba mynta ka dei kaba kham pher, kaba phylla, kaba pynkhih ia ki paidbah ban buh jingkylli-kaei ka Sixth Schedule, kaei ka District Council bad kaei kata ka Article 371.

“Ngi donkam ban sngewthuh kaei ka kamram jong u MDC, kiei kita ki bor ba ka District Council ka don. Ka kamram jong u MDC kat kum ka Sixth Schedule ka long ka bor bad ka stieh ban iada ia ki jaka hapoh ka Ri-lum Khasi-Jaintia namar la aibor ia ki MDC ba kin thaw ain ban iada ia ngi ki riewlum” ula ong.

Ula pynshai ba ym tang ka Article 371, hynrei kiwei kiwei ki Article hapoh ka Riti Synshar ka Ri kim don satia ia ki lai tylli ki paia- Executive Power, Legislative Power bad Judiciary Power kumba don hapoh ka Sixth Schedule.

Haba pynpaw ia ka jinglyngngoh ia ka jingkwah Article 371 jong kawei ka seng sain pyrthei, u Bah Pyniaid ula pynshai “Lada kiwei ki Jylla hapoh ka Ri khamtam na ka thain Shatei Lam Mihngi ki kwah ban pyntreikam ia ka Sixth Schedule, kumno ngi bala don lypa ngin pan ban pynduhnoh ha ka jaka ban iakhun iaksaid ban nang pynkhlain shuh shuh ia ka”.

Ula pyntip ba kum u CEM ka KHADC, ka Executive Committee ba u ialam kala iakhun ban pynduh noh ia ka Para 12(a) kaba la ioh iaka jingkyrshan na baroh ki 10 tylli ki ADC ka thain Shatei Lam Mihngi ka Ri.

“Ngi donkam ia ki briew kiba nang ba stad bad kiba sngewthuh ia ki ain khnang ban pynsuk bad pyntyllun ia ki kam la ka dei kaba iadei bad ka Sorkar Pdeng ne Sorkar Jylla” ula ban jur.

Ula iathuh ruh ba kum u CEM ha ka por ba lyngkot, ka Executive Committee kala lah ban wanrah ia katto katne ki ain ban pynkhlain shuh shuh ia ki bor jong ki Dorbar Shnong, ban ithuh ia ki Dorbar Kur, Seng Kur bad Rangbah Kur, ki Seng Samla, ki Seng Kynthei nalor ka ain ban pynskhem shuh shuh ia ka rukam bat khyndew hapoh Ri-lum Khasi.