Shillong, Risaw 28 : U Symbud Myntri Rangbah bad Chairman ka Regional Committee ka West Jaintia Hills, Bah Sniawbhalang Dhar, ula ong ba jingpynkhreh ia ka kaiphod halor ki shnong ba don ha ki jaka iakajia pud kynthup kito ha Block I bad Khanduli-Psiar, ka la jan dep artad.
“Ka kaiphod halor ki shnong kiba don ha shilynter ki jaka iakajia kala jan dep artad. Shisien ba la aiti, ngin sa pyntip ia u Myntri Rangbah khnang ba ki artylli ki Regional Committee na Meghalaya bad Assam kin lah ban iashong jingialang noh” ong u Bah Dhar.
Halor ka jingdawa ban pynthikna ba baroh ki 56 tylli ki shnong ha Block-I kin shah kynthup ha Meghalaya, u Bah Dhar ula ban jur ba ki Regional Committee ki dei kiba la thaw ban shong bishar ia kane ka mat bad ban aiti ia ka kaiphod halor ka jinglong jingman jong kine ki shnong.
“Ngim pat lah ban ong ba ngi leh ia kata. Kumta, ki Regional Committee kila don ban shong bishar ia kane kamat bad ban wanrah ia ka kaiphod ba batai ia kita ki 56 shnong bad kumno ki long. Kumta, ngi la bthah ia u Deputy Commissioner ba yn aiti ia ka kaiphod ba bniah halor kane” ula bynrap.
U Bah Dhar ula pyntip ba ula aiktien sha u Chairman ka Assam Regional Committee ba ka Meghalaya ka long kaba la khreh ban iakynduh ha kano kano ka por ban iapynbeit ia kane ka kam, hynrei kapaw ba ki iabunkam namar ka jingwan jong ka elekshon ha Assam.
