Shillong Kyllalyngkot 16: U Myntri Rangbah ka Jylla Conrad K Sangma ula pynbna ha ka sngi Palei, ba ka Jylla kala jam shaphrang ha kaba iadei bad ka kam tih dewiong da ka jingstad saïan ne Scientific Mining, ha kaba 4 ngut ki riewshimet kila ioh ia ka lisen bad kila sdang ia ka jingkynshew ban thied ia ki tiar ki tar bad ia ki jingtei.
Haba iakren bad ki nongthoh khubor, u Sangma ula ong, “Saw ngut ki riewshimet kila ioh ia ka lisen bad kila sdang ia ka jingkhynshew tyngka ha ki bynta ki bapher bapher bad kila buh ruh ia ki tiar ki tar ha ki katto katne ki jaka bad ka jingtih par da ka jingstad saïan kala sdang”.
Haba pynshai halor kane ka jingiaid shakhmat, u Conrad ula ong, ba ia ka jingtih dewiong da ka jingstad saïan lah dep ban plie arsien.
U Myntri Rangbah ula pynpaw ia ka jingkyrmen ba ka rukom ai ia ka lisen kan nang iaid shakhmat, ha kaba palat ia ka 17-20 ngut ki aplikeshon ki dang sahkut bad ka sorkar pdeng.
“Katno thik, ngam kynmaw bha ia ka jingdon hynrei kumba 17-20 ne palat kila aplai ban ioh ia ka lisen bad kane ka dang sahteng bad ka Sorkar Pdeng. Nga khmih lynti ba kitei ki kam ki jam, mynta haba ka SOPs kala long kaba shai kdar bad ki 4 ngut kila ioh jingmynjur kaba long ka bynta kaba jwat bha, Nga khmih lynti ba sa ki 17 ne 20 ngut kiba la aplai ne bun shuh shuh kiba la sdang wan shakhmat, kin sa ioh noh shen ia ka lisen” ong u Myntri Rangbah.
