Nongpoh, Nailur 14 : Ka Ri-Bhoi Presbyterian Higher Secondary School, kala jam mynta sa sha uwei pat u mawmer ha ka jingshakri ban pynsaphriang ia ka jingnang jingstad ha ka thain, da ka jingplie mawnongrim ia ka jingtei (building) ban pynkha sa ia ka shnat pule Commerce bad ka Science Stream ha kane ka skul.
Ia une u mawnongrim la plie paidbah da u MP ka Shillong Bah Vincent Pala haka jingiadon lang u MLA ka thain bah Mayralborn Syiem, ka DSEO Ri-Bhoi Kong PL Nonglait, ki Bor pyniaid ka skul, ki nonghikai bad ki khynnah skul.
Ia kane ka jingtei ban pynkha ia ka Commerce bad Science Stream la mang ha ka jinglut kaba kot kumba T. 4.64,71,000 bad la bei tyngka ia ka da ka Balang Presbyterian.
Ki bor pyniaid skul kila phaikhmat ruh ia ka jingnoh synniang lem jong u MP bad u ML ka thain ban lah pynbiang ia ki jingdonkam baroh ha kaban lah pyndep kloi ia kane ka jingtei.
Haba ai jingkren, u Bah Vincent H Pala, u la pynpaw ia ka jingkmen kaba khraw ban sakhi ba kane ka shlem ai jingnang jingstad ka la nang iar bad kiew na kawei ka snem sha kawei pat bad kaba kham sngewtynnad ka long ba lyngba kane ka shlem ai jingstad, ka la lah ban pynmih ia ki riew khraw ha kiba bun ki liang n aka thain.
U la iathuh ruh, ba mynta ka sorkar ka la don hapdeng ka jingtrei borbah ban nang pynkhlain bad pynjanai ia ka pule ka puthi hapoh ka jylla hi baroh kawei kiban iahap kyrdan katkum ka juk kaba mynta khamtam ia ka National Education Policy, da kaba kyntu ruh ia ki samla pule hapoh kane ka district, ba kin long kiba iai minot bad kiba treishitom kumno ban kin paw bad kiew ha ka jingim ka jong ki.
