Shillong, Nailur 14: U Myntri Rangbah ka jylla Conrad K Sangma, hynne ka sngi Palei, ula sam iaka Work Order jong ka Pradhan Mantri Awaas Yojana (PMAY) sha ki nongioh jingmyntoi na ka shnong Mawlyndep, Umsning C&RD Block, Ri-Bhoi District lyngba ka Saansad Adarsh Gram Yojana (SAGY-II).
Happy to be back at the scenic Mawlyndep Village, under Umsning C&RD Block, Ri Bhoi District. Today we distributed work orders to 97 beneficiaries of the PMAY scheme from the village, giving them access to affordable housing.
Mawlyndep village is a model village in the District… pic.twitter.com/lMa5ynh4of
— Conrad K Sangma (@SangmaConrad) September 14, 2023
Haba kren ha ka jingialang u Conrad K Sangma, ula ong ba kam pynroi kadei ban poi sha man la ki kyndong kynshrot jong ka jylla.
“Lada ka roi ka par kam poi sha ka jingim jong ki paidbah kiba sah ha kylleng ki bynta jong ka jylla, kumta ka roi ka par kan long kaba leh tang dep” ong u Conrad.
Ula ong, ba ka sorkar kala pyrshang katba lah ban pyniar bad kala pynmih ia ki prokram kiba rit bad kiba heh ha ki kyrdan bapher ban wanrah iaka roi ka par kaba salonsar ia ki paidbah ka jylla.
“Ka PMAY prokram kaba mynta kadei sa kawei ka sienjam na ka bynta ban kynjoh ban ai iaka roi ka par kaba salonsar bad kadei ka thong jong ka sorkar ban sam sha ki tnad kiba iadei bad ka imlang sahlang ha ki snem ban wan” ula bynrap.
U Myntri Rangbah ula ong ba ka thong jong ka sorkar kadei ia ki 5 tylli ki bynta kiba kongsan kiba kynthup ban ai ïing ia baroh, ban pynbiang iaka bording elektrik ia baroh, ka jingshna ia ki surok ban pyniasoh ia ki shnong ki thaw, ka jingpynbiang umbam umdih ia baroh bad ban pynbiang iaka Network Mobile.
Ula pyntip ba kumba 1,30,000 tylli ki longïing kaba kot kumba T.1700 Klur yn sa bhah bad pynshna lyngba ka mang tyngka jong une u snem ban pynthikna ba bun ngut ki briew kin ioh jingmyntoi bad ula kyntu ia ki nongioh jingmyntoi ba kidei ban pyndonkam ia katei ka pisa kumba la bhah sha ki.
“Ki Rangbah Shnong, BDO, Project Director ki donkam ban pynsngewthuh ia ki paidbah bad ki nongioh jingmyntoi ba kin pyndonkam ia katei ka pisa na ka bynta ka kam kumba la dep bhah” ong u Conrad.
Ula pynpaw ruh ia kiwei pat ki projeck kiba la pynkhreh na ka bynta ka shnong Mawlyndep bad ki shnong kiba marjan.
Kila don 97 ngut ki nongioh jingmyntoi naka shnong Mawlyndep kiba la ioh iaka Work Order.
Ha katei ka jingialang la iadonlang u MP ka Rajya Sabha u Dr W Kharlukhi, u MLA ka Umsning u Dr C Lyngdoh, ka MDC ka Umsning ka Kong Macdalyne Sawkmie, ki heh ophisar sorkar bad ki bor pyniaid district.
