Shillong, Lber 31: Ka Meghalaya kala jam sha uwei pat u mawmer ha kaba kala pynbna iaka jingioh jingithuh ne ka shap Geographical Indication (GI), kaba long ka sakhi ia ka jingriewspah jong ka kolshor kaba rim ba jah bad ka sap thaiñ jingthain kaba kyrpang. Na kitei ki mar kiba la ioh iaka GI Tag ki kynthup ia ka Meghalaya Garo Textile, Lyrnai Pottery, Meghalaya Chubitchi bad Lakadong Turmeric.
Kine ki 4 tylli kiba la ioh iaka GI Tag ym tang ba ki pyni nam ia ka kolshor ka Meghalaya hynrei ki long ruh kum ka lad kamai jakpoh na ka bynta ki 30,000 ngut ki riewshimet kiba don bynta ha katei ka kam pynmih bad khaii bad ka jingioh jingithuh kadei na ka jingkongsan ha kaban pynneh pynsah iaka jingnang jingtip tynrai, ban kyntiew ia ka kamai jakpoh bad ban kyntiew ia ka ioh ka kot jong ka thaiñ.
Ha ka 30 tarik u Lber, ka ophis jong u Registrar of Geographical Indications, Chennai kala pynbna bad pynkhamti iaka Geographical Indication Tag No. 741 ia u Lakadong Turmeric lyngba ka Journal No 185 Part 1 jongka Government of India. Kane ka long ka khyllipmat kaba kongsan ia ka jylla khamtam ia ki nongrep ia u Lakadong ha ka jylla bad ia ka shnong Lakadong kiba la ioh ia ka hok ia ka jinglongtrai ia u Shynrai uba bha tam ha ka pyrthei.
Ki 3 tylli kiwei pat kiba la ioh ia ka GI Tag ki kynthup ia u Garo Dakmanda, Larnai pottery bad Garo Chubitchi lyngba ka journal No 185 Part 3.
Ka Lakadong Mission kadei kaba la sdang ha 24 tarik u Iaiong 2018 bad kala long ka mishon kaba la wanrah ia ka jingkylla kaba pynleit jingmut ha kaban kyntiew ia ka ioh ka kot jong ki nongrep bad kito kiba pynmih ia ki mar lyngba ki marrep da kaba kyntiew ia u shynrai Lakadong. Kane ka mishon kala long kaba seisoh ha kaba kala wanrah ia ka jingkylla ia palat 12,000 ngut ki nongrep, 20 tylli ki kynhun jong ki nongrep kiba donbynta ha kaban thied bad ban sam ia ki symbai kiba paka.
Ka jingioh GI Tag ka jingshna ia ki khiew ne Larnai pottery ka pyni shai kdar ia ka jingkyrpang ha ka rukom shna ia ki khiew kaba long naduh kip or hyndai hynthai. Ka jingiaid lynti ban pynioh ia ka GI Tag na ka bynta ka Larnai Pottery kala sdang naduh u bnai Nailur jong u snem 2013 bad kane ka jingioh jingithuh mynta ym tang ba ka iada ia ka jinglongtrai haka rukom shna ia kine ki khiew dewbyrtha hynrei ka plie lad ruh ban ban pynneng pynsah iaka kolshor kyrpang uba rim bajah.
Ki jain Dakmanda kidei ki jain tynrai jong ki Garo ia kaba la phong ia ki da ki kynthei kum ka skad bad kadei ka jaiñ kaba la thain jrong kaba la tip kum ka ‘khidig’ bad kane ka pyni ia ka jingriewspah ka kolshor ki jaidbynriew Garo.
Ka kyiad tynrai ki Garo ka Chubitchi kadei kaba la pyndonkam ha ka lehniam lehrukom bad kadei kaba la shna tynrai da kaba pdem ia kaba la tip ruh kum ka Chubitchi ne Chubok kaba dei kaba don bynta haka bam ka dih bad kolshor.
Kane ka kyiad kadei kaba la pdem bad shna ha ki iing ki sem bad ka rong ka jongka ka long kum ka dud ia kaba la shna da u khaw bad la ju pynjaw ruh ha ka shyntur jongki khunlung haba kila nang ban ngud.
Ki Garo ki khein ba ka Chubitchi ka long kawei na ki bynta kiba kongsan bha ha ka kolshor ka jongim ka jongki bad la pyndonkam ia ka ha ka por ba don ka jinglehniam, jingialang, jingiakynduh lang, sngikha, jingkyntiew kurim, ha ka shad Wangala bad kumta ter ter.
Lyngba ka jingkyrshan ka Meghalaya Farmers’ Empowerment Commission, NABARD, RO Shillong bad ka Sorkar Jylla, kane ka jingjop kaba khraw kadei ka sakhi ia ka jingiatreilang da baroh da ka jingthmu ban pynneh pynsah bad ban kyntiew ia ka jinglong kyrpang ka Meghalaya ha ka jinglong tynrai bad ha ki kam shna bad thaiñ tynrai.
